Live Updates

وزیراعلیٰ کی گاڑی پر حملہ صوبے پرحملہ ہے، علی امین گنڈا پور کا آئی جی اسلام آباد کو ہٹانے کا مطالبہ

اگر آئی جی اسلام آباد کو نہ ہٹایا گیا تو دارالحکومت پر دوبارہ دھاوا بولیں گے، علی امین گنڈاپور کا خطاب

منگل 8 اکتوبر 2024 20:55

پشاور (اُردو پوائنٹ اخبارتازہ ترین - این این آئی۔ 08 اکتوبر2024ء) وزیر اعلیٰ خیبرپختونخوا علی امین گنڈا پور نے وفاق سے انسپکٹر جنرل (آئی جی) اسلام آباد کو ہٹانے کا مطالبہ کرتے ہوئے کہا ہے کہ صوبے کے وزیراعلیٰ کی گاڑی پر حملہ پورے صوبے پر حملہ ہے، اگر آئی جی اسلام آباد کو نہ ہٹایا گیا تو دارالحکومت پر دوبارہ دھاوا بولیں گے۔خیبرپختونخوا اسمبلی سے دھواں دھار خطاب کرتے ہوئے وزیراعلیٰ علی امین گنڈا پور نے کہاکہ وفاق نے ہماری املاک پر حملہ کیا، گاڑیوں کے شیشے توڑے، ہم پھر آ رہے ہیں۔

انہوں نے کہاکہ بانی پی ٹی آئی نے واضح کیا ہے کہ ہماری فوج سے کوئی لڑائی نہیں ہے، پرامن احتجاج ہمارا جمہوری حق ہے۔علی امین نے اپنی صفائی پیش کرتے ہوئے کہا کہ بانی پی ٹی آئی کے حامیوں کی کنفیوڑ کیا جارہا ہے، جو بھی نظریے کے ساتھ منافقت کررہا ہے ، اللہ اسے اور اس کے خاندان کو غرق کرے، قوم کسی کی باتوں میں نہ آئے۔

(جاری ہے)

انہوںنے کہاکہ خیبرپختونخوا کے علاوہ جہا ں بھی جلسہ کرنا چاہیں تو فسطاعیت کی جاتی ہے، ہمیشہ سے پرامن جلسے اور جلوس کی ہدایت پر عمل پیرا ہیں، لاہور میں جلسہ کرنا چاہا تو 80 کلومیٹر دور مویشی منڈی میں جگہ دی۔

علی امین گنڈا پور نے کہاکہ تمام رکاوٹیں عبورکرکے اسلام آباد پہنچے، ڈی چوک بھی وڑجانا تھا لیکن ہم اپنی حد سے آگے نہیں بڑھے۔انہوں نے کہا کہ مجھے خیبرپختونخوا ہاؤس جاکر احتجاج سے متعلق فیصلہ کرنا تھا، ہمارے پہنچتے ہی خیبرپختونخوا ہاؤس پر پولیس اور رینجرز نے دھاوا بول دیا۔انہوںنے کہاکہ خیبر پختونخوا ہاؤس میں موجود پولیس اہلکاروں اور کارکنوں پر تشدد کیا گیا، آئی جی نے توڑ پھوڑ کے دوران موبائل فون چھین لیا تھا، مجھے اندازہ ہوگیا تھا کہ میری گرفتاری وقار کے ساتھ نہیں ہوگی، خیبر پختونخوا ہاؤس سے نکلا تو جیب میں موبائل تھا نہ ہی ایک روپیہ۔

علی امین گنڈا پور نے کہاکہ میرے اپنے صوبے کے ڈی پی او نے کہاکہ آپ کو پشاور پہنچانے کی ضمانت نہیں دے سکتا،ڈی پی او نے کہا میرے چھوٹے چھوٹے بچیہیں، میری نوکری چلی جائے گی۔وزیراعلیٰ خیبر پختونخوا نے کہاکہ ہمارے کارکنوں کے جذبے سے حکمرانوں کی ٹانگیں کانپ رہی ہیں، گرتی ہوئی دیواروں کو ایک دھکے کی ضرورت ہے، ہم جہاں پہنچے ہیں اگلا قدم شہباز شریف کا بیڈ روم ہے لیکن عمران خان نے کہاہے کہ پرامن جدوجہد کرنی ہے۔انہوں نے کہاکہ گرفتار کارکنوں کی فہرستیں مرتب کرلی ہیں،انہیں رہا کرائیں گے۔