معروف وکیل نعیم بخاری کے نام سے بنے اکانٹ سے شرمناک ٹویٹ، لوگوں کا شدید ردعمل

رکن قومی اسمبلی رعنا انصار کا جوان بیٹا شاہزیب کراچی میں ٹریفک حادثے میں جاں بحق ہوگیا تھا نعیم بخاری اس حادثاتی موت کو آئینی ترامیم اور سیاست سے جوڑ کر انتہائی خباثت اور ذلالت کا مظاہرہ کررہا ہے،صارف

جمعرات 24 اکتوبر 2024 14:35

کراچی(اُردو پوائنٹ اخبارتازہ ترین - این این آئی۔ 24 اکتوبر2024ء) پاکستان تحریک انصاف کے رہنما نعیم بخاری کے نام سے بنے ایکس اکائونٹ سے ایم کیو ایم رکن قومی اسمبلی کے جوان بیٹے کی موت پر شرمناک ٹوئٹ کی گئی جس کے بعد انہیں شدید تنقید کا سامنا ہے۔واضح رہے کہ رکن قومی اسمبلی رعنا انصار کا جوان بیٹا شاہ زیب نقوی کراچی میں ٹریفک حادثے میں جاں بحق ہوگیا تھا۔

اس وقت رعنا انصار کو بیٹے کی موت کا علم ہوا تب وہ اسلام آباد میں تھیں۔ادھر مختلف سیاسی اور سماجی شخصیات نے رعنا انصار کے جوان بیٹے کی موت پر تعزیت کی۔ سماجی روابط کی ویب سائٹ ایکس پر بنے پی ٹی آئی رہنما اور سینئر ایڈووکیٹ نعیم بخاری کے اکائونٹ سے ایک ٹوئٹ کی گئی۔انہوں نے ابتدائی جملوں میں شاہ زیب کے انتقال کی خبر دی اور پھر ایک شعر لکھا کہ جگہ جی لگانے کی دنیا نہیں ہے۔

(جاری ہے)

یہ عبرت کی جا ہے تماشہ نہیں ہے۔سوشل میڈیا صارفین نے نعیم بخاری کو ٹوئٹ کو شرمناک قرار دیا،جس میں وہ جوان بیٹے کی موت پر ماں کو دلاسہ دینے کے بجائے شعر کے ذریعے نمک پاش کررہے ہیں۔ایک خاتون صارف نے لکھا کہ تم جو کوئی بھی ہو، ہم سب اپنی زندگی میں کسی پیارے سے ہمیشہ کیلئے بچھڑنے کے درد سے لازمی گزرتے ہیں، یہ درد ہم سب کی زندگی میں آتا ہے۔

جب تم اس درد سے گزرو تو یہ الفاظ تمہاری تکلیف میں اضافے کا باعث بنیں۔ایک صارف نے کہا کہ نعیم بخاری اس حادثاتی موت کو آئینی ترامیم اور سیاست سے جوڑ کر انتہائی خباثت اور ذلالت کا مظاہرہ کررہا ہے۔ایک اور صارف نے کہا کہ حادثہ کسی کی زندگی میں کسی وقت بھی آسکتا ہے کسی بھی وقت ہم اپنے پیاروں سے جدا ہوسکتے ہیں تم جیسے بیمار ذہنیت کو جواب دینا بنتا تو نہیں ہے لیکن تم کو اوقات یاد دلانا بھی ضروری ہے۔