جدہ میں جے کے سی او کی جانب سے چودھری محمد یاسین کے اعزاز میں پروقار عشائیہ

جدہ (رپورٹ حسن بٹ، اُردو پوائنٹ اخبارتازہ ترین۔ 19 فروری2025ء) جموں و کشمیر کمیونٹی اوورسیز (جے کے سی او) جدہ نے صدر پاکستان پیپلز پارٹی آزاد جموں و کشمیر، چودھری محمد یاسین کے اعزاز میں ایک شاندار اور پروقار عشائیے کا انعقاد کیا۔ یہ تقریب جدہ کے ایک معروف ہوٹل میں منعقد ہوئی، جس میں پاکستان کے قونصل جنرل خالد مجید سمیت پاکستان اور کشمیر کی معروف سیاسی، سماجی اور مذہبی شخصیات نے شرکت کی۔

تقریب کے میزبان سابق مشیر برائے اوورسیز صدر آزاد کشمیر عنایت اللہ خان عارف تھے، جنہوں نے مہمانوں کا گرمجوشی سے استقبال کیا۔ صدارت سابق چیئرمین جے کے سی او خورشید احمد متیال نے کی، جنہوں نے اپنے ابتدائی کلمات میں چودھری محمد یاسین کی خدمات کو سراہا اور کشمیری عوام کے حق خودارادیت کے لیے ان کی کوششوں کو خراجِ تحسین پیش کیا۔

(جاری ہے)

چودھری محمد یاسین نے تقریب سے خطاب کرتے ہوئے اپنے حالیہ دورۂ امریکا کی تفصیلات شیئر کیں۔

انہوں نے بتایا کہ اس دورے میں 140 ممالک کے نمائندے شریک تھے، جہاں انہوں نے کشمیر کے مسئلے کو بین الاقوامی سطح پر اٹھانے کی کوشش کی۔ انہوں نے کشمیری عوام کی بہادری کو خراجِ تحسین پیش کرتے ہوئے کہا کہ وہ بھارتی فوج کے مظالم کا دلیری سے سامنا کر رہے ہیں اور ہمیشہ پاکستان سے اپنی محبت کا اظہار کرتے ہیں۔ انہوں نے زور دے کر کہا کہ کشمیر کا مسئلہ پاکستان کی خارجہ پالیسی کا اہم ترین ایجنڈا ہے اور اسے حل کیے بغیر خطے میں امن قائم نہیں ہو سکتا۔

قونصل جنرل پاکستان خالد مجید نے بھی تقریب سے خطاب کرتے ہوئے حکومتِ پاکستان کی جانب سے کشمیری عوام کی سیاسی، سفارتی اور اخلاقی مدد جاری رکھنے کے عزم کا اعادہ کیا۔ انہوں نے کہا کہ پاکستان ہر فورم پر کشمیری عوام کے حق خودارادیت کے لیے آواز بلند کرتا رہے گا اور بھارت کی جانب سے کشمیر میں انسانی حقوق کی پامالیوں کو بین الاقوامی سطح پر اٹھائے گا۔

انہوں نے کشمیری عوام کے ساتھ یکجہتی کا اظہار کرتے ہوئے کہا کہ پاکستان کشمیریوں کے ساتھ کھڑا ہے اور ان کی جدوجہد کو ہر ممکن حمایت فراہم کرے گا۔ تقریب کے دوران دیگر مقررین نے بھی خطاب کیا۔ سردار عنایت اللہ عارف نے کشمیری عوام کی قربانیوں کو یاد کیا اور کہا کہ ان کی جدوجہد جاری رہے گی۔ چودھری خورشید احمد متیال نے چودھری محمد یاسین کو عمرہ کی سعادت پر مبارکباد پیش کی اور کہا کہ یہ سعادت ان کی محنت اور خلوص کی وجہ سے ملی ہے۔

سردار اشفاق احمد خان اور سردار مہتاب نے کشمیری عوام کے حق خودارادیت کے لیے اپنی جدوجہد جاری رکھنے کا عزم دہرایا۔ صدر پیپلز پارٹی سعودی عرب چوہدری تصور حسین نے بھی خطاب کرتے ہوئے کہا کہ کشمیری عوام کی آزادی تک پاکستان کی حمایت جاری رہے گی۔ تقریب کا اختتام دعا اور پرتکلف عشائیے پر ہوا، جہاں تمام شرکاء نے کشمیری عوام کے ساتھ یکجہتی کا اظہار کیا جبکہ تقریب میں نظامت فرائض راجہ شمروز خان نے ادا کئے ۔ یہ تقریب نہ صرف چودھری محمد یاسین کے اعزاز میں تھی بلکہ کشمیری عوام کے حقوق کے لیے پاکستان کی مستقل حمایت کی عکاس بھی تھی۔