امیرمقام نے وزیراعلی علی امین گنڈا پورا کا وزیراعلی پنجاب کو مناظرے کا چیلنج قبول کرلیا

جمعہ 21 فروری 2025 23:30

اسلام آباد (اُردو پوائنٹ اخبارتازہ ترین - این این آئی۔ 21 فروری2025ء) وفاقی وزیر امور کشمیر اور پاکستان مسلم لیگ (ن) خیبرپختونخوا کے صدر انجینئر امیر مقام نے وزیراعلی علی امین گنڈا پورا کا وزیراعلی پنجاب کو مناظرے کا چیلنج قبول کرلیا ۔ اپنے بیان میں وفاقی وزیر نے کہاکہ علی امین گنڈا پورا کسی بھی ٹی وی چینل پر آئیں اور مجھ سے مناظرہ کریں، ہم تیار ہیں ،علی امین کو چیلنج ہے کہ وہ خیبرپختون خوا اسمبلی میں آئیں اور اپنی کارکردگی پر اپوزیشن لیڈر سے لائیو مناظرہ کریں ۔

انہوںنے کہاکہ وزیراعلی خیبرپختون خوا وقت اور تاریخ بتائیں تاکہ عوام کے سامنے سچ اور جھوٹ واضح ہوجائے ۔ انہوںنے کہاکہ ہم بتائیں گے کہ مریم نوازشریف نے ایک سال میں پنجاب میں کیا کیا ، پی ٹی آئی خیبرپختون خوا میں اپنی تیرہ سال کی کارکردگی بتائے ۔

(جاری ہے)

انہوںنے کہاکہ علی امین گنڈا پورا بتائے کہ اٴْن کے لیڈرکے اعلان کردہ ساڑھے تین سو ڈیمز گیارہ سال میں کیوں نہیں بن سکی ،علی امین گنڈا پور بتائے کہ خیبرپختون خوا کے کرپشن میں ملوث وزرا کے خلاف اب تک کیا کارروائی ہوئی کتنوں کو سزا ملی ،9 مئی کو ریاست ، فوجی تنصیبات اور شہدا کی یادگاروں پر حملے کرانے والے ماسٹر مائنڈ کے نام پر ارباب نیاز کرکٹ سٹیڈیم پشاور کا نام نہیں رکھنے دیں گے ،پاکستان کو ڈیفالٹ کرانے اور آئی ایم ایف کو معاشی مدد سے روکنے کے لئے خط لکھنے والے کے نام پر سٹیڈیم کا نام نہیں رکھنے دیں گے ۔

انہوںنے کہاکہ کرکٹ میں جوا کھیلنے والے سالے کو جتوانے کے لئے ٹپس دینے والے کے نام پر کرکٹ سٹیڈیم کا نام نہیں رکھنے دیں گے ،اسرائیل اور بھارت سے فارن فنڈنگ لینے اور پاکستان کے خلاف بیرونی ممالک سے قراردادیں منظور کرانے والے کے نام پر سٹیڈیم کا نام نہیں رکھنے دیں گے ،190 ملین پائونڈ قوم کا چوری کرنے والے کے نام پر سٹیڈیم کا نام نہیں رکھنے دیں گے،دہشت گردی اور دہشت گردوں کو واپس لانے اور یہاں بسانے والے کے نام پر سٹیڈیم کا نام نہیں رکھنے دیں گے