ایڈووکیٹ جنرل پنجاب امجد پرویز نے عہدے کا چارج سنبھال لیا

عدالتوں کی آئین اور قانون کے مطابق معاونت کریں گے‘آفس آمد پر گفتگو

بدھ 5 مارچ 2025 17:03

لاہور (اُردو پوائنٹ اخبارتازہ ترین - این این آئی۔ 05 مارچ2025ء)ایڈووکیٹ جنرل پنجاب امجد پرویز نے عہدے کا چارج سنبھال لیا۔آفس پہنچنے پر لاء افسران اور ملازمین نے ایڈووکیٹ جنرل پنجاب امجد پرویز کو پھول پیش کئے۔اس موقع پر نئے ایڈووکیٹ جنرل پنجاب امجد پرویز نے گفتگو کرتے ہوئے کہا کہ پنجاب حکومت کے اعتماد کرنے پر مشکور ہوں، ادارے کی بہتری کیلئے اقدامات کروں گا، عدالتوں کی آئین اور قانون کے مطابق معاونت کریں گے۔

امجد پرویز کا کہنا تھا کہ سابق ایڈووکیٹ جنرل خالد اسحاق ایک پروفیشنل وکیل تھے، مجھے بھی سب پروفیشنل وکیل کے طور پر جانتے ہیں۔

(جاری ہے)

یاد رہے کہ گزشتہ روز پنجاب حکومت نے امجد پرویز کی بطور ایڈووکیٹ جنرل پنجاب تقرری کا نوٹیفکیشن جاری کیا تھا۔امجد پرویز فوجداری، نیب اور آئینی مقدمات کے ماہر سمجھے جاتے ہیں، ایڈووکیٹ جنرل پنجاب خالد اسحاق کے لاہور ہائیکورٹ کا جج بننے کے بعد ایڈووکیٹ جنرل پنجاب کی سیٹ خالی ہوئی تھی۔

واضح رہے کہ امجد پرویز ایڈووکیٹ مسلم لیگ (ن) کے قائد نواز شریف، وزیراعظم شہباز شریف اور وزیراعلی پنجاب مریم نواز کے وکیل بھی رہ چکے ہیں۔اس کے علاوہ امجد پرویز ایڈووکیٹ سابق وزیر اعلی پنجاب پرویز الٰہی اور ان کے صاحبزادے مونس الٰہی کے وکیل بھی رہ چکے ہیں۔