Live Updates

عمران خان ملک کے عظیم لیڈر ہیں، کرپٹ حکمرانوں نے جمہوریت کو یرغمال بنا رکھا ہے، منصور شیخ

بدھ 19 مارچ 2025 18:00

کراچی (اُردو پوائنٹ اخبارتازہ ترین - این این آئی۔ 19 مارچ2025ء)پاکستان تحریک انصاف کراچی ڈویژن کے سینئر نائب صدر اور صدر ٹان کے چیئرمین منصور احمد شیخ نے اپنے ایک بیان میں کہا ہے کہ عمران خان ملک کے عظیم لیڈر ہیں جنہیں عوام نے اپنے ووٹ کے ذریعے منتخب کیا ہے، لیکن بدقسمتی سے پاکستان میں جمہوریت کو یرغمال بنا کر کرپٹ حکمرانوں کو مسلط کیا گیا ہے۔

انہی نااہل حکمرانوں کی غلط پالیسیوں اور کرپٹ طرز حکمرانی کی وجہ سے عوام مہنگائی کے بوجھ تلے دب چکی ہے۔منصور احمد شیخ نے کہا کہ ملک میں دہشت گردی میں خطرناک حد تک اضافہ ہو چکا ہے، جو قومی سلامتی کے لیے نہایت تشویشناک ہے۔ ملک میں بدامنی اور افرا تفری کا ماحول پیدا ہو چکا ہے، جس سے ملکی استحکام کو شدید خطرات لاحق ہو گئے ہیں۔

(جاری ہے)

اگر عوام کی امنگوں کے مطابق فیصلے نہ کیے گئے تو ملک ایک بنانا ریپبلک بن کر رہ جائے گا، جہاں قانون کی عملداری ختم ہو جائے گی۔

انہوں نے مزید کہا کہ یہ فوج بھی ہماری ہے اور یہ ادارے بھی ہمارے ہیں، ہمیں ایسی پالیسیاں مرتب کرنی ہوں گی جن سے ملک ترقی کرے اور حقیقی جمہوریت پروان چڑھے۔ کرپٹ اور چور حکمرانوں کا خاتمہ اب وقت کی ضرورت بن چکا ہے۔ اگر ملک کو بحرانوں سے نکالنا ہے تو شفاف اور غیر جانبدار انتخابات کا انعقاد یقینی بنایا جائے اور عمران خان خان سمیت تمام سیاسی اسیران کو فوری رہا کیا جائے اور جھوٹے کیسز ختم کئے جائیں تاکہ عوام کو ان کے حقیقی نمائندے مل سکیں اور پاکستان کو ترقی کی راہ پر گامزن کیا جا سکے۔