پاکستان آنے والے سکھ یاتریوں کی تعداد میں اضافہ پاکستان پر اعتماد کا مظہر ہے ‘ سردار رمیش سنگھ اروڑہ

لاہور(اُردو پوائنٹ اخبارتازہ ترین - این این آئی۔ 08 اپریل2025ء)صوبائی وزیر اقلیتی امور، رمیش سنگھ اروڑہ کی زیر صدارت محکمہ داخلہ پنجاب میں وساکھی میلہ کے انتظامات کے حوالے سے ایک اعلی سطحی اجلاس منعقد ہوا۔ اجلاس میں وساکھی میلہ کے انتظامات کا تفصیلی جائزہ لیا گیا جبکہ مختلف متعلقہ محکموں کے افسران نے اپنی رپورٹس پیش کیں۔ ایڈیشنل سیکرٹری شرائنز سیف اللہ کھوکھر نے دوران بریفنگ بتایا کہ وساکھی میلہ 10 اپریل سے 19 اپریل تک جاری رہے گا جس میں 20 ہزار مقامی یاتری اور بھارت سمیت دنیا بھر سے 7 ہزار یاتری خصوصی طور پر شرکت کریں گے جبکہ کرتارپور میں 16 اپریل کو مذہبی رسومات کی ادائیگی کے ساتھ کبڈی میچ کا بھی اہتمام کیا جائے گا۔

صوبائی وزیر اقلیتی امور رمیش سنگھ اروڑہ نے اجلاس سے خطاب کرتے ہوئے کہا کہ وزیراعلی پنجاب نے گزشتہ برس یاتریوں کے لیے راستے کھولنے پر زور دیا تھا اور اس سال سات ہزار یاتریوں کی بڑی تعداد کا آنا اسی سلسلے کی ایک اہم کڑی ہے۔

(جاری ہے)

انہوں نے کہا کہ ہم سب کو ملکر ایک بہترین ٹیم ورک کے نتیجے میں یاتریوں کی حفاظت اور آرام دہ قیام کے لیے خصوصی انتظامات یقینی بنانا ہوں گے۔

صوبائی وزیر نے لیسکو حکام کو فیسٹیول کے دوران بجلی کی بلا تعطل فراہمی یقینی بنانے کی ہدایت کرتے ہوئے سیکرٹری متروکہ وقف املاک بورڈ کو یاتریوں کے لیے ائیر کنڈیشنڈ مارکیوں کا انتظام کرنے کی ہدایت کی۔ رمیش سنگھ اروڑہ نے متعلقہ انتظامیہ کو سینئر سٹیزن کانٹرز، اضافی باتھ رومز، ہیوی ویٹ جنریٹرز کی تلقین کرتے ہوئے ایف آئی اے حکام کو ہدایت کی کہ یاتریوں کی آسانی کیلئے مزید کانٹرز کا انتظام کیا جائے جبکہ کرنسی ایکسچینج کے لیے معیاری ڈیلرز کا انتخاب کرنے اور یاتریوں کی سہولت کے لیے بینک آف پنجاب کے کانٹرز لگانے کی بھی ہدایت دی گئی۔

صوبائی وزیر نے بہترین کوآرڈینیشن کے لیے محکمہ اقلیتی امور سے ایک فوکل پرسن نامزد کرنے اور ڈی سی اٹک کو یاتریوں کے لیے بہتر رہائشی انتظامات کو یقینی بنانے کی ہدایت کی۔ صوبائی وزیر نے اس بات پر زور دیا کہ ایک سال میں پنجاب میں ٹور ازم میں 72 فیصد اضافہ ہوا ہے اور وزیراعلی پنجاب نے مذہبی اقلیتوں کے تمام تہواروں میں شرکت کرکے ایک تاریخ رقم کی ہے۔

امید ہے کہ وزیر اعلی پنجاب مریم نواز وساکھی میلہ میں شرکت ضرور کریں گی۔ صوبائی وزیر نے تمام محکموں اور اداروں کے نمائندگان کو ٹرانسپورٹ کے فٹنس سرٹیفیکیٹس، وسیع لنگر کے انتظام، میڈیکل سہولتیں اور ایمبولینسز کی فراہمی کو یقینی بنانے کی بھی ہدایت کی تاکہ یاتریوں کو کسی بھی قسم کی تکلیف کا سامنا نہ کرنا پڑے۔ سیکرٹری داخلہ پنجاب نور الامین مینگل نے متعلقہ انتظامیہ کوحسن ابدال اور ننکانہ صاحب میں مستقبل کیلئے وسیع انتظامات کرنے اور اس ضمن میں ماسٹر پلان تیار کرنے کی ہدایت کی۔

انہوں نے کہا کہ اس مرتبہ سکھ یاتریوں کی ایک بڑی تعداد پاکستان آ رہی ہے اور دنیا بھر سے آنے والے یاتریوں کے لیے بہتر انتظامات پاکستان کی توقیر کے لیے نہایت اہم ہیں۔ اجلاس میں سیکرٹری متروکہ وقف املاک بورڈ، ایڈیشنل سیکرٹری شرائنز، سیکرٹری انسانی حقوق، پاک رینجرز، پولیس، قانون نافذ کرنے والے اداروں کے نمائندگان نے شرکت کی۔ مختلف اضلاع کے ڈی سی اور ڈی پی اوز نے ویڈیو لنک کے زریعے اجلاس میں شرکت کی۔