Live Updates

رقم نہ بھیجنے کی شیخیاں مارنے والوں کواپنی اوقات پتا چل گئی، خواجہ آصف

بیرون ملک آباد پاکستانی اپنے وطن سے بے پناہ محبت کرتے ہیں،شکر ہے منافقوں کے ٹولے سے جان چھوٹی، بانی پی ٹی آئی جس دلدل میں چھوڑ کر گئے آج پاکستان کی افواج اور حکومت ملکر ملک کیلئے کام کررہی ہے، وزیر دفاع کی میڈیا سے گفتگو

فیصل علوی جمعرات 17 اپریل 2025 11:27

رقم نہ بھیجنے کی شیخیاں مارنے والوں کواپنی اوقات پتا چل گئی، خواجہ ..

لندن(اردوپوائنٹ اخبار تازہ ترین۔17اپریل 2025)وزیر دفاع خواجہ آصف کا کہنا ہے کہ رقم نہ بھیجنے کی شیخیاں مارنے والوں کواپنی اوقات پتا چل گئی، مارچ میں 4 ارب سے زائد ڈالر کی ترسیلات ریکارڈ ہے، بیرون ملک آباد پاکستانی اپنے وطن سے بے پناہ محبت کرتے ہیں،لندن میں مسلم لیگ ن کے صدر نواز شریف سے ملاقات کیلئے ایوان فیلڈ آمد پر میڈیا سے گفتگو کرتے ہوئے وزیر دفاع نے کہا کہ وزیر اعظم شہباز شریف کی قیادت میں ملک ترقی کی راہ پر چل پڑا ہے۔

ہم پر بھی مشکل وقت آیا تھا لیکن ہم پاکستان سے بھاگے نہیں تھے۔ اسمبلیوں میں بیٹھی آدھی پی ٹی آئی نورا ہوچکی ہے اس کے بانی کو اپنی حمایت میں بندے ڈھونڈنے پڑیں گے۔انہوں نے کہا کہ پاکستان تحریک انصاف میں جتنے لوگ ہیں اتنی ہی پارٹیاں بن چکی ہیں۔

(جاری ہے)

بانی پی ٹی آئی جس دلدل میں چھوڑ کر گئے آج پاکستان کی افواج اور حکومت ملکر ملک کیلئے کام کررہی ہے۔

شکر ہے منافقوں کے ٹولے سے جان چھوٹی۔پی ٹی آئی حکومت کا جو حال ہوا سب نے دیکھا۔ بانی پی ٹی آئی عمران خان قوم سے معافی مانگے۔ بانی پی ٹی آئی آج ترلے کررہا ہے، پھرچوری چکاری کیلئے ڈیل چاہتاہے۔ایک سوال کے جواب میں وزیر دفاع خواجہ نے کہا کہ بانی پی ٹی آئی عمران خان قوم سے معافی مانگے بھی تو اقتداران کے حوالے نہیں ہوگا اس نے ریاست کے خلاف جرائم کئے ہیں۔

بانی پی ٹی آئی کو اپنے جرائم کی سزا بھگتنا پڑے گی۔میڈیا سے گفتگو کرتے ہوئے وزیر دفاع خواجہ نے مسلم لیگ ن کے صدر نواز شریف کی صحت سے متعلق بتاتے ہوئے کہا کہ ان کا علاج جاری ہے۔ نواز شریف کالندن آنے کا مقصد خالصتاً علاج کرانا ہی ہے۔ ان کی روزانہ کی بنیاد پرمیڈیکل اپوائنٹمنٹ ہیں۔ میری نوازشریف سے اچھی ملاقات رہی جس میں ذاتی نوعیت کی باتیں ہوئیں۔

پاکستان میں ہائبرڈ ماڈل ہے۔ ملک آگے لے جانے کیلئے سیاسی جماعتوں اورسٹیبلشمنٹ سب کی پارٹنرشپ ہے۔ پی ٹی آئی حکومت نام نہاد ہائبرڈ تھی۔بانی پی ٹی آئی عمران خان پوری قوم سے معافی مانگیںجس طرح انہوں نے ہماری تصویریں چلائیں آج ان کی چل رہی ہیں۔انہوں نے لوگوں کی جیبوں میں ہاتھ ڈالے ہوئے تھے۔ان کا مزید کہنا تھا کہ اوورسیز پاکستانیز کنونشن دنیا کے مختلف ممالک میں ہونا چاہیے۔مارچ میں 4ارب سے زائد ڈالر کی ترسیلات ریکارڈ ہے۔ پیسے نہ بھیجنے کی شیخیاں مارنے والوں کو اپنی اوقات پتا چل گئی۔بلوچستان کے مسائل بندوق کے زور پر نہیں بلکہ اس کا سیاسی حل تلاش کرنا ہوگا۔ بی ایل اے اگر پاکستانیوں کو مارے گی تو اسے قیمت ادا کرنی پڑے گی۔