این اے 213ضمنی الیکشن، پیپلز پارٹی کی امیدوار صبا تالپور نے میدان مار لیا

عمرکوٹ کے این اے 213 پر ضمنی انتخابات میں تمام 498 پولنگ اسٹیشنز کے غیر حتمی و غیر سرکاری نتائج کے مطابق پیپلز پارٹی کی صبا تالپور ایک لاکھ 61 ہزار 934 ووٹ لئے جبکہ آزاد امیدوار لال چند 81 ہزار 160 ووٹ لےکر دوسرے نمبر پر رہے

فیصل علوی جمعہ 18 اپریل 2025 10:53

این اے 213ضمنی الیکشن، پیپلز پارٹی کی امیدوار صبا تالپور نے میدان مار ..

عمر کوٹ(اردوپوائنٹ اخبار تازہ ترین۔18اپریل 2025)عمر کوٹ میں قومی اسمبلی کے حلقہ 213 کے ضمنی انتخاب میں پاکستان پیپلز پارٹی کی امیدوار صبا تالپور نے میدان مار لیا،عمرکوٹ کے این اے 213 پر ضمنی انتخابات میں تمام 498 پولنگ اسٹیشنز کے غیر حتمی و غیر سرکاری نتائج آگئے جس کے مطابق پیپلز پارٹی کی صبا تالپور ایک لاکھ 61 ہزار 934 ووٹ لے کر کامیاب ہوگئیں جبکہ آزاد امیدوار لال چند مالھی دوسرے نمبر پر رہے،ضمنی الیکشن میں کامیابی پر جیالوں نے جشن منایا جبکہ چیئرمین پیپلز پارٹی بلاول بھٹو زرداری نے کامیابی پر صبا تالپور کو مبارکباد دی۔

غیر سرکاری نتیجے کے مطابق آزاد امیدوار لال چند 81 ہزار 160 ووٹ لےکر دوسرے نمبر پر رہے۔آزاد امیدوارلال چند نے نتائج مستردکردیے اور ڈی آر او آفس کے سامنے دھرنا دیا جبکہ مشتعل افراد نے ٹائروں کو آگ لگاکر سڑک بلاک کر دی اور آج ہڑتال کا اعلان کیا گیا۔

(جاری ہے)

عمر کوٹ کے ضمنی الیکشن میں کامیابی پر پیپلزپارٹی کے جیالوں کی جانب سے جشن منایا جارہا ہے اور مٹھائیاں تقسیم کی جارہی ہیں۔

یہ بھی بتایاگیا تھا کہ ووٹنگ کے دوران مختلف جماعتوں کے کارکنوں کے درمیان تلخ کلامی بھی ہوئی جبکہ مخالف امیدواروں کی جانب سے ایک دوسرے پر دھاندلی کے الزامات بھی عائد کئے گئے۔حلقے میں مجموعی طور پر 18امیدوار مد مقابل تھے۔ ضمنی انتخاب میں پیپلزپارٹی کی امیدوار صبا تالپور اور جی ڈے اے کے حمایت یافتہ امیدوار لال چند مالھی میں سخت مقابلہ متوقع تھا۔

دریں اثناءپاکستان پیپلزپارٹی کے چیئرمین بلاول بھٹوزرداری نے عمرکوٹ کے ضمنی الیکشن کے نتائج پر ردعمل دیتے ہوئے کہا کہ کامیابی جیالوں کی محنت کا نتیجہ ہے۔صبا تالپور کی کامیابی جمہوریت کی فتح ہے۔آج حیدرآباد میں این اے213 کی کامیابی کا جشن منائیں گے۔چیئرمین پیپلزپارٹی نے یہ بھی کہا کہ عوام کےاعتماد کامظہرہے۔اس کے علاوہ وزیراعلیٰ سندھ مراد علی شاہ نے ضمنی انتخاب میں کامیابی پر صبا تالپور کو مبار کباد دیتے ہوئے کہا کہ عمرکوٹ کے عوام نے ایک بار پھر پیپلز پارٹی پر اعتماد کا اظہار کیاہے۔

وزیراعلیٰ سندھ کا کہنا تھا کہ جمہوری عمل کی کامیابی عوام کی فتح ہے۔واضح رہے کہ این اے 213 عمر کوٹ میں ضمنی انتخاب کیلئے پولنگ کا آغاز گزشتہ روز صبح 8 بجے ہوا جو شام 5 بجے تک بلاتعطل جاری رہا تھا۔این اے 213 عمر کوٹ کی نشست پیپلزپارٹی کے رہنما نواب یوسف تالپور کے انتقال کے بعد خالی ہوئی تھی۔