پہلگام فائرنگ میں 28 سیاح ہلاک، پاکستان کا واقعے پر تشویش کا اظہار

فائرنگ کے واقعے کے دوران کھلے میدان میں لوگ جان بچانے کے لیے بھاگتے رہے لیکن چھپنے کی کوئی جگہ نہیں تھی

ساجد علی بدھ 23 اپریل 2025 11:17

پہلگام فائرنگ میں 28 سیاح ہلاک، پاکستان کا واقعے پر تشویش کا اظہار

اسلام آباد ( اُردو پوائنٹ اخبارتازہ ترین۔ 23 اپریل 2025ء ) پاکستان کی جانب سے مقبوضہ کشمیر کے مشہور سیاحتی مقام پہلگام میں پیش آنے والے فائرنگ کے واقعے میں ہلاکتوں پر سخت ردعمل دیتے ہوئے اس واقعے پر تشیوش کا اظہار کیا ہے۔ اس حوالے سے دفترِ خارجہ کے ترجمان شفقت علی خان نے کہا کہ پاکستان کو مقبوضہ جموں و کشمیر میں سیاحوں کے جانی نقصان پر تشویش ہے، پاکستان ہلاک افراد کے عزیز و اقارب سے اظہار تعزیت کرتا ہے، زخمیوں کی جلد صحت یابی کیلیے نیک تمناؤں کا اظہار کرتے ہیں۔

بتایا گیا ہے کہ مقبوضہ جموں و کشمیر کے سیاحتی مقام پہلگام میں نامعلوم افراد کی فائرنگ سے 28 سیاح ہلاک اور 11 زخمی ہو گئے، ہلاک ہونے والوں میں دو غیرملکیوں میں سے ایک کا تعلق اٹلی، ایک کا اسرائیل سے ہے، مرنے والوں میں سے بیشتر کا تعلق بھارتی ریاست گجرات اور کرناٹک سے ہے۔

(جاری ہے)

عینی شاہدین نے بتایا کہ فائرنگ کے واقعے کے دوران کھلے میدان میں لوگ جان بچانے کے لیے بھاگتے رہے لیکن چھپنے کی کوئی جگہ نہیں تھی، ایک بھارتی خاتون کی تصویر سوشل میڈیا پر وائرل ہوئی ہے جس میں وہ اپنے شوہر کی لاش سے لپٹی رو رہی ہے، ہلاک ہونے والوں میں بھارتی بحریہ کا افسر اور انٹیلی جنس بیورو کا اہلکار بھی شامل ہے، واقعے کے بعد بھارتی فوج اور پولیس تاخیر سے پہنچیں، تب تک حملہ آور فرار ہونے میں کامیاب ہو گئے۔

بتایا جارہا ہے کہ پہلگام کا علاقہ سیاحوں کے لیے ’منی سوئٹزرلینڈ‘ کے طور پر مشہور ہے، فائرنگ کے واقعے کے بعد علاقہ خوف اور بے یقینی کی فضا میں ڈوبا ہوا ہے، حملے کے بعد بھارتی فورسز نے علاقے میں آپریشن شروع کر دیا جب کہ وزیر اعظم مودی نے اپنا سعودی عرب کا دورہ مختصر کرتے ہوئے واپس پہنچ گئے اور انہوں نے سعودیہ سے ہی وزیر داخلہ امیت شاہ کو پہلگام روانہ ہونے کی ہدایت کی تھی۔