فیڈرل ڈائریکٹوریٹ امیونائزیشن نے 31ویکسین ڈیلیوری ٹرک وفاقی وزارت صحت کے حوالے کر دئیے

ہمارا مشن ہر گھر کی دہلیز پر طبی خدمات کی فراہمی ہے، نہیں چاہتا پولیو نہ پلانے والوں کی ایف آئی آر کاٹیں، مصطفی کمال

بدھ 23 اپریل 2025 20:35

اسلام آباد (اُردو پوائنٹ اخبارتازہ ترین - این این آئی۔ 23 اپریل2025ء)اسلام آباد میں فیڈرل ڈائریکٹوریٹ امیونائزیشن کی جانب سے 31ویکسین ڈیلیوری ٹرک وفاقی وزارت صحت کے حوالے کر دئیے گئے ہیں۔تفصیلات کے مطابق عالمی امدادی ادارے یونیسیف و گاوی نے 31ریفری جریٹر ٹرک انسداد پروگرام حفاظتی ٹیکہ جات کو فراہم کیے جس کے بعد یہ ریفریجریٹر ویکسین ٹرک تمام صوبوں کے حوالے کئے گئے۔

ویکسین ٹرک پنجاب، سندھ، خیبر پختونخواہ، بلوچستان، گلگت بلتستان اور اسلام آباد کو دئیے گئے ہیں ۔ اس موقع پر گفتگو کرتے ہوئے وفاقی وزیر صحت مصطفی کمال نے کہا کہ ہمارا مشن ہے گھر کی دہلیز پر سروسز دیں، بہت جلد ہم ڈاکٹر اور ادویات گھر کی دہلیز پر پہنچائیں گے۔انہوں نے کہا کہ انسان اشرف المخلوقات ہے اور ایک دوسرے کے دکھ درد میں کام آتا ہے۔

(جاری ہے)

میں ڈاکٹر نہیں میں طالبعلم ہوں جو شخص درد میں ہمارے پاس آتا ہے ہم نے اس کا درد کم کرنا ہے۔انہوں نے کہا کہ ہم ہیلتھ سسٹم کو ٹھیک کرنے کی کوشش کر رہے ہیں کیونکہ مرض سے بچانے کیلئے حفاظتی اقدامات کی ضرورت ہے، حفاظتی ٹیکہ جات بھی اسی سلسلہ کی ایک کڑی ہے۔انہوں نے کہا کہ پاکستانی عوام سے کہتا ہوں اپنے بچے کو پولیو ویکسین پلانے سے کیوں انکار کرتے ہیں، پولیو کے خاتمہ کیلئے وزیر اعظم پاکستان فکر مند ہیں،والدین کیوں اپنے بچوں کے دشمن بن گئے ہیں ۔انہوں نے کہا کہ افغانستان اور پاکستان صرف دو ملک رہ گئے ہیں جن میں پولیو وائرس پایا جا رہا ہے، پولیو ورکرز کی قدر کریں ان کا شکریہ ادا کریں۔ انہوں نے کہا کہ میں نہیں چاہتا کہ ہم پولیو نہ پلانے والوں کی ایف آئی آر کاٹیں۔