Live Updates

احسن اقبال کی بھارت کی جانب سے پاکستان پر حالیہ بے بنیاد الزامات کی شدید مذمت

بھارت کی جھوٹے مکارانہ آپریشنز کے ذریعے پاکستان کو بدنام کرنے کی ایک خطرناک تاریخ حاصل ہے،وفاقی وزیرمنصوبہ بندی

جمعرات 24 اپریل 2025 22:45

اسلام آباد(اُردو پوائنٹ اخبارتازہ ترین - این این آئی۔ 24 اپریل2025ء)وفاقی وزیر منصوبہ بندی احسن اقبال نے بھارت کی جانب سے پاکستان پر حالیہ بے بنیاد الزامات کی شدید مذمت کرتے ہوئے کہا ہے کہ یہ اقدامات بھارت کی ایک منظم مہم کا حصہ ہیں جس کا مقصد مقبوضہ جموں و کشمیر میں جاری انسانی حقوق کی بدترین خلاف ورزیوں سے عالمی توجہ ہٹانا اور پاکستان کے خلاف اپنے مذموم عزائم کو تقویت دینا ہے۔

اپنے ویڈیو پیغام میں انہوں نے کہا کہ بھارت کی جھوٹے مکارانہ آپریشنز کے ذریعے پاکستان کو بدنام کرنے کی ایک خطرناک تاریخ حاصل ہے، یہ غیر ذمہ دارانہ روش نہ صرف علاقائی امن کے لئے خطرہ ہے بلکہ اس کا مقصد بھارتی حکومت کی اندرونی ناکامیوں اور کشمیری عوام پر بڑھتے ہوئے مظالم سے توجہ ہٹانا بھی ہے۔

(جاری ہے)

انہوں نے کہا کہ پاکستان وہ ملک ہے جس نے دہشت گردی کے خلاف سب سے زیادہ قربانیاں دی ہیں ،ہزاروں جانوں کا نذرانہ دیا ہے اور اربوں ڈالر کا معاشی نقصان ہوا ہے،اس کے باوجود پاکستان نے دنیا کے سامنے ایک پرامن، ذمہ دار اور ترقی پسند ریاست کے طور پر اپنی پہچان بنائی ہے۔

انہوں نے کہا کہ بھارت کی جانب سے سندھ طاس معاہدے کو یکطرفہ طور پر سبوتاژ کرنے کی کوششیں انتہائی تشویشناک ہیں، یہ معاہدہ ایک بین الاقوامی معاہدہ ہے جس پر بھارت کی بد نیتی سے کوئی سمجھوتہ نہیں کیا جائے گا، پاکستان اپنے پانی کے حقوق کے تحفظ کے لئے ہر ممکن اقدام کرے گا۔انہوں نے کہا کہ میں عالمی برادری سے اپیل کرتا ہوں کہ وہ بھارت کی گمراہ کن چالوں کو پہچانے اور کشمیریوں کے حق خودارادیت، علاقائی امن اور انصاف کے لئے اپنی آواز بلند کرے، پاکستان امن کا خواہاں ہے لیکن اپنی خودمختاری، سلامتی اور قومی مفادات کے تحفظ پر کوئی سمجھوتہ نہیں کرے گا۔