وزیراعظم کا اشیاء کی قیمتوں کی مجموعی سالانہ شرح منفی 3.52 فیصد تک کم ہونے پر اظہار اطمینان

اسلام آباد ( اردوپوائنٹ اخبار تازہ ترین۔ آئی پی اے ۔ 25 اپریل 2025ء ) وزیراعظم نے اشیاء کی قیمتوں کی مجموعی سالانہ شرح منفی 3.52 فیصد تک کم ہونے پر اظہار اطمینان کیا ہے۔ میڈیا کے مطابق وزیراعظم محمد شہباز شریف نے حساس قیمتوں کے اشارئیے (sensitive price index ) کی سالانہ شرح منفی 3.52 فیصد تک کم ہونے پر اظہار اطمینان کرتے ہوئے کہا کہ 2024 میں اسی ماہ، یہ شرح 26.94 فیصد تھی جو کہ اپریل 2025 میں منفی 3.52 ریکارڈ کی گئی ہے۔

ملک کے معاشی اشاریے ہر گزرتے دن کے ساتھ بہتری کی طرف گامزن ہیں۔ وزیراعظم شہبازشریف نے کہا کہ حکومت کی بھرپور کوشش ہے کہ عوام کو بہتر ہوتے معاشی اشاریوں کے ثمرات ملیں، وزیراعظم نے حکومت کی معاشی ٹیم کی تعریف کی۔ یاد رہے ملک میں ہفتہ وار بنیاد پر مہنگائی کی شرح میں 1.92فیصد کی مزید کمی ہوئی ہے، مہنگائی کی مجموعی سالانہ شرح منفی 3.52فیصد ہوگئی۔

(جاری ہے)

ادارہ شماریات پاکستان نے ہفتہ وار مہنگائی سے متعلق رپورٹ جاری کردی۔ ادارہ شماریات کے مطابق ایک ہفتے میں 11 اشیا مہنگی اور 18 سستی ہوئیں جبکہ 22 اشیائے ضروریہ کی قیمتیں مستحکم رہیں۔ بجلی کے سہ ماہی چارجز 19.17 فیصد کم ہوئے جبکہ ایک ہفتے میں چکن 11.75، آٹا 5.68 اور لہسن 4.66فیصد سستا ہوا جبکہ کیلے 3.51، پیاز 1.93 اور چاول 1.58 فیصد سستے ہوئے۔ رپورٹ کے مطابق گزشتہ ہفتے سرسوں کا تیل، ٹماٹر، بجلی اور ایل پی جی بھی سستی ہونی والی اشیا میں شامل ہیں۔

ادارہ شماریات کے مطابق ایک ہفتے کے دوران 11 اشیائے ضروریہ کی قیمتوں میں اضافہ ہوا، جن میں آلو 6.94 فیصد، انڈے 0.66فیصد، نمک 0.51فیصد مہنگا ہوا، گڑ، دہی، دال مسور، چنا، سگریٹ، کپڑے بھی مہنگی ہونیوالی اشیا میں شامل ہیں۔ یاد رہے کہ مارچ کے مہینے میں مہنگائی بڑھنے کی شرح 3دہائیوں کی کم ترین سطح 0.7فیصد پر آگئی تھی۔ادارہ شماریات نے مہنگائی سے متعلق ماہانہ رپورٹ میں کہا تھا کہ فروری 2025 میں مہنگائی بڑھنے کی سالانہ شرح 1.52 فیصد ریکارڈ کی گئی، جولائی تا مارچ اوسط مہنگائی کی شرح 5.25 فیصد رہی، فروری کے مقابلے میں مارچ میں مہنگائی کی شرح میں 0.89فیصد اضافہ ہوا تھا۔

گزشتہ روز وزارت خزانہ نے ماہانہ معاشی اپ ڈیٹ اینڈ آئوٹ لک میں مہنگائی سے متعلق تخمینہ جاری کیا تھا، جس میں مئی میں مہنگائی ممکنہ طور پر بڑھ کر 3 سے 4 فیصد کے درمیان تک پہنچنے کا خدشہ ظاہر کیا گیا تھا۔وزارت خزانہ کا کہنا تھا کہ رواں ماہ اپریل میں مہنگائی 1.5فیصد سے 2 فیصد کے درمیان رہنے کی توقع ہے، ملک میں مارچ 2025 کے دوران مہنگائی کی شرح 0.69فیصد ریکارڈ کی گئی تھی، جولائی 2024 سے مارچ 2025 کے دوران مہنگائی کی اوسط شرح 5.25 فیصد تھی۔