Live Updates

ہندوتوا کا پرچار اور نفرت کی سیاست بھارت کے اتنے ٹکڑے کرے گی کہ گنتی بھی نہیں ہوگی،خواجہ محمد آصف

ہفتہ 26 اپریل 2025 00:10

اسلام آباد (اُردو پوائنٹ اخبارتازہ ترین - اے پی پی۔ 26 اپریل2025ء) وزیر دفاع خواجہ محمد آصف نے کہا ہے کہ جب آپ کشمیر میں لاکھوں کی آبادی کو سالوں محصور رکھیں، مستقل کرفیو نافذ ر کھیں، ان پر زندگی تنگ کر دیں، 10 لاکھ فوج مسلط کرکے پوری نسل کو یرغمال بنالیں، ظلم کی انتہا کر دیں تو مودی صاحب ”پھر اس طرح تو ہوتا ہے اس طرح کے کاموں میں“۔ جمعہ کو سماجی رابطے کے پلیٹ فارم ”ایکس“ پر اپنی پوسٹ میں انھوں نے کہا کہ دو ہی کام ہو سکتے ہیں یا تو یہ واردات آپ کی دہشت گردانہ ذہنیت کا کارنامہ ہے یا پھر ....۔

انہوں نے کہا کہ ظلم پھر ظلم ہے، بڑھتا ہے تو مٹ جاتا ہے ،خون پھر خون ہے، ٹپکے گا تو جم جائے گا۔ انہوں نے کہا کہ پاکستان پر الزام لگانے سے پہلے اپنے گریباں میں جھانکیں، آپ کی نفرت کی سیاست منی پور، ناگا لینڈ، تری پورہ، چھتیس گڑھ، پنجاب، کشمیر اور بہت سے علاقوں میں اثر دکھا چکی، نفرت کی یہ سیاست بھارت کے درجنوں ٹکڑے کرے گی۔

(جاری ہے)

خواجہ محمد آصف نے کہا کہ مودی صاحب محبت اور رواداری بانٹیں، آپ گجرات کے نہیں ہندوستان کے وزیراعظم ہیں جو قومیتوں اور مذاہب کا مجموعہ ہے۔

ہندوتوا کا پرچار بھارت کے اتنے ٹکڑے کرے گا کہ آپ سے گنتی بھی نہیں ہوگی۔بھارت کے اندر بھی شانتی رکھیں اور ہمسایوں سے بھی شانتی سے رہیں۔ انہوں نے کہا کہ دہشت گردی کینیڈا، امریکہ اور ہمسایوں کو ایکسپورٹ نہ کریں، اپنی اوقات میں رہیں۔