مودی حکومت ریاستی دہشت گردی کے ذریعے کشمیریوں کو بے گھر اور خوفزدہ کر رہی ہے ،مشتاق احمد بٹ

اسلام آباد (اُردو پوائنٹ اخبارتازہ ترین - اے پی پی۔ 27 اپریل2025ء) کل جماعتی حریت کانفرنس آزاد کشمیر و پاکستان شاخ نے بھارتی ہندتوا مودی حکومت کی جانب سے سانحہ پہلگام کی آڑ میں کشمیری حریت پسند عوام کے گھروں کو مسمار کرنے اور ہزاروں کشمیریوں کو اس سانحہ کی آڑ میں گرفتار کرنے کی شدید ترین الفاظ میں مذمت کی ہے۔یہاں جاری بیان کے مطابق کل جماعتی حریت کانفرنس کے سیکرٹری اطلاعات مشتاق احمد بٹ نے جاری بیان میں کہا کہ مودی حکومت اس طرح کی ریاستی دہشت گردی کے ذریعے کشمیریوں کو بے گھر اور خوفزدہ کر رہی ہے تاکہ وہ بھارت کی غلامی کو قبول کر لیں اور مودی حکومت آسانی سے کشمیر کی ڈیموگرافی تبدیل کر سکے۔

مشتاق احمد بٹ نے کہا کہ سانحہ پہلگام ایک افسوسناک واقعہ ہے جس کی جتنی بھی مذمت کی جائے کم ہے۔

(جاری ہے)

تاہم، اس المناک واقعے کو کشمیری عوام کے خلاف ایک ہتھیار کے طور پر استعمال کرنا اور ان کے گھروں کو بلڈوز کرنا انتہائی قابل مذمت اور بین الاقوامی قوانین کی صریحاً خلاف ورزی ہے۔ یہ اقدام نہ صرف بھارتی ریاستی دہشت گردی کی بدترین مثال ہے بلکہ یہ انسانی حقوق کی سنگین پامالی ہے اور کشمیری عوام کو ان کے بنیادی حقوق سے محروم کرنے کی ایک سوچی سمجھی سازش ہے۔

انہوں نے مزید کہا کہ مودی حکومت کی یہ پالیسی مقبوضہ جموں و کشمیر میں خوف و ہراس کی فضا پیدا کرنے اور کشمیریوں کی حق خود ارادیت کی جائز آواز کو دبانے کی مذموم کوشش ہے۔ ہزاروں بے گناہ کشمیری نوجوانوں کی گرفتاری اور انہیں عقوبت خانوں میں ڈالنا ایک ایسا عمل ہے جس سے نہ صرف ان کے اہل خانہ اذیت کا شکار ہیں بلکہ پوری کشمیری قوم میں غم و غصہ پایا جاتا ہے۔

مشتاق احمد بٹ نے اقوام عالم اور جملہ انسانی حقوق کی تنظیموں سے پرزور اپیل کی کہ وہ آگے بڑھیں اور بھارتی ہندتوا حکومت کے ان تمام غیر قانونی اور غیر آئینی اقدامات کو روکنے کے لیے اپنا موثر کردار ادا کریں۔ انہوں نے عالمی برادری سے مطالبہ کیا کہ وہ مسئلہ کشمیر کو اقوام متحدہ کی قراردادوں اور کشمیری عوام کی امنگوں کے عین مطابق حل کرنے میں اپنی منصبی ذمہ داری نبھائیں۔

مشتاق احمد بٹ نے خبردار کیا کہ مسئلہ کشمیر کے حل میں مزید تاخیر دنیا کے امن کے لیے انتہائی خطرناک ہے۔ اس میں تاخیر سے خطے میں ایٹمی جنگ کا خطرہ ہر وقت منڈلاتا رہیگا اور کسی بھی ناخوشگوار واقعے کا ذمہ دار بھارت ہوگا۔ انہوں نے عالمی طاقتوں سے مطالبہ کیا کہ وہ اس سنگین صورتحال کا فوری نوٹس لیں اور جنوبی ایشیا میں پائیدار امن کے قیام کے لیے ٹھوس اقدامات اٹھائیں۔

کل جماعتی حریت کانفرنس آزاد کشمیر و پاکستان شاخ ایک بار پھر اپنے اس عزم کا اعادہ کرتی ہے کہ کشمیری عوام اپنی حق خود ارادیت کی جدوجہد ہر قیمت پر جاری رکھیں گے اور بھارتی جبر و استبداد کے سامنے کبھی نہیں جھکیں گے۔ ہم عالمی برادری سے مطالبہ کرتے ہیں کہ وہ کشمیری عوام کی منصفانہ جدوجہد کی حمایت کریں اور انہیں ان کا بنیادی حق دلوانے میں اپنا کردار ادا کریں۔