Live Updates

پاکستان کی معاشی ترقی بھارت کو ہضم نہیں ہو رہی، پاکستانی عوام اپنی بہادر مسلح افواج کے ساتھ شانہ بشانہ بھارت کو جواب دینے کیلئے تیار ہیں،فیصل معیز خان

اتوار 27 اپریل 2025 13:30

اسلام آباد (اُردو پوائنٹ اخبارتازہ ترین - اے پی پی۔ 27 اپریل2025ء) نارتھ کراچی ایسوسی ایشن آف ٹریڈ اینڈ انڈسٹری (نکاٹی)کے صدر فیصل معیز خان کہا ہے کہ یہ حقیقت ہے کہ پاکستان کی معاشی ترقی بھارت کو ہضم نہیں ہو رہی، بھارت کی جانب سے دریاؤں پر بلا اجازت ڈیمز کی تعمیر، پانی چھوڑنے یا روکنے جیسے اقدامات سندھ طاس معاہدے کی خلاف ورزی ہیں، بھارت کی دھمکیوں سے پاکستان دبنے والا نہیں ہے، پاکستانی عوام اپنی مسلح افواج کے شانہ بشانہ بھارت کے ہر وار کا سخت جواب دینے کیلئے تیار ہیں۔

اتوار صدر نکاٹی نے یہاں جاری اپنے ایک خصوصی بیان میں کہا کہ بھارت کی آبی دہشت گردی دنیا کے سامنے آچکی ہے اور دشمن ملک پاکستان کی زرعی اور معاشی بنیادوں کو کمزور کرنے کی کوشش کر رہا ہے اور اب بھارت کو اینٹ کا جواب پتھر سے دینا ہو گا۔

(جاری ہے)

فیصل معیز خان نے کہا کہ بھارت پہلگام میں دہشت گردی کا جھوٹا ڈرامہ رچا کر پاکستان کو نقصان پہنچانے کی ناکام کوشش کر رہا ہے تاہم اب بھارتی عوام بھی جان چکے ہیں کہ یہ جھوٹ ہے، بھارت نے یہ ڈرامہ ایک امریکی شخصیت کے بھارت میں دورے کے موقع پر کیا تاکہ امریکا کی حمایت حاصل کر سکے۔

فیصل معیز خان نے کہا کہ دنیا جان چکی ہے کہ پاکستان کسی بھی دہشت گردی میں ملوث نہیں، پاکستان کے ہاتھ مکمل طور پر صاف ہیں، وزیراعظم پاکستان اور وفاقی وزیر داخلہ نے بھارت کو غیر جانبدارانہ تحقیقات میں تعاون کی پیشکش کی ہے تاکہ یہ ثابت ہو جائے کہ پاکستان کااس واقعہ میں کوئی کردار نہیں ہے مگر بھارت ٹال مٹول سے کام لے رہا ہے جو اس کی بدنیتی کا واضح ثبوت ہے۔ انہوں نے کہا کہ بھارت کے ناپاک عزائم کو خاک میں ملانے کیلئے پاکستان کا بچہ بچہ اپنی پاک افواج کے ساتھ آخری دم تک لڑنے کیلئے تیار ہے۔