Live Updates

حکومت کی کوشش ہے کہ بانی سے ملاقات کو روکا جائے، عمر ایوب

یہ کٹھ پتلی حکومت ہے، اب ان کی کانپیں ٹانگ رہی ہیں، اپوزیشن لیڈر کی راولپنڈی میں گفتگو

پیر 28 اپریل 2025 15:36

راولپنڈی(اُردو پوائنٹ اخبارتازہ ترین - این این آئی۔ 28 اپریل2025ء)اپوزیشن لیڈر اور تحریک انصاف کے رہنما عمر ایوب کا کہنا ہے کہ بانی پی ٹی آئی سے ملاقات نہیں ہونے دی جارہی۔ان کا کہنا تھا کہ حکومت کی کوشش ہے کہ بانی پی ٹی آئی سے ملاقات کو روکا جائے۔اپوزیشن لیڈر اور تحریک انصاف کے رہنما عمر ایوب نے اے ٹی سی راولپنڈی کے باہر میڈیا سے گفتگو کرتے ہوئے اہم امور پر تبصرہ کیا۔

عمر ایوب نے کہا کہ توشہ خانہ ٹو کیس کی سماعت بھی ملتوی کر دی گئی ہے۔فرد جرم عائد کرنے کے لیے ضروری دستاویزات فراہم کی گئی ہیں۔عمر ایوب نے وزیر اعظم شہباز شریف پر سخت تنقید کرتے ہوئے کہا کہ شہباز شریف بزدل وزیراعظم ہیں اور انہوں نے ہتھیار ڈال دیے ہیں۔ ان کا کہنا تھا کہ شہباز شریف کو دوٹوک بتانا چاہیے کہ اگر بھارت کی جانب سے حملہ کیا گیا تو پاکستان زمینی اور فضائی حملے کرے گا۔

(جاری ہے)

عمر ایوب نے یوکرین کے حوالے سے بھی سخت موقف اپنایا۔ انہوں نے کہا کہ شہباز شریف نے امریکہ کے کہنے پر یوکرین کو گولہ بارود فروخت کیا۔ ان کا کہنا تھا کہ یہ کٹ پتلی حکومت ہے، اور اب ان کی کانپیں ٹانگ رہی ہیں۔عمر ایوب نے کہا کہ زرداری نے خود سندھ کا پانی فروخت کیا ہے۔ انہوں نے مزید کہا کہ ملک میں افراتفری کی صورتحال ہے اور ساڑھے پانچ سو ارب روپے کا ایرانی پیٹرول اسمگل ہو رہا ہے۔عمر ایوب نے مزید کہا کہ بلوچستان کے حالات انتہائی خراب ہیں۔ جعفر ایکسپریس کے سانحے کو بھی انٹیلی جنس کی ناکامی قرار دیتے ہوئے کہا کہ یہ واقعہ انٹیلی جنس ناکامی تھا۔