Live Updates

جنرل عاصم ملک کو مشیر قومی سلامتی مقرر کرنا وقت کی ضرورت اور حکومت کا اچھا اقدام ہے

ان کی تعیناتی سے بین الاقوامی سطح پرسکیورٹی معاملات کو مزید تقویت ملے گی اور پاکستان کا کیس مزید مضبوطی سے لڑا جائے گا۔ وفاقی وزیراطلاعات عطاء اللہ تارڑ

ثنااللہ ناگرہ جمعرات 1 مئی 2025 21:30

جنرل عاصم ملک کو مشیر قومی سلامتی مقرر کرنا وقت کی ضرورت اور حکومت کا ..

اسلام آباد ( اردوپوائنٹ اخبار تازہ ترین۔ آئی پی اے ۔یکم مئی 2025ء ) وفاقی وزیراطلاعات عطاء اللہ تارڑ نے کہا ہے کہ جنرل عاصم ملک کو مشیر قومی سلامتی مقرر کرنا وقت کی ضرورت اور حکومت کا اچھا اقدام ہے،ان کی تعیناتی سے بین الاقوامی سطح پرسکیورٹی معاملات کو مزید تقویت ملے گی اور پاکستان کا کیس مزید مضبوطی سے لڑا جائے گا۔۔ انہوں نے ہم نیوز کے پروگرام میں گفتگو کرتے ہوئے کہا کہ پاکستان اور امریکا کے درمیان روابط ہوتے رہتے ہیں، نائب وزیراعظم اسحاق ڈار کا بھی رابطہ رہتا ہے۔

امریکی وزیرخارجہ کا وزیراعظم سے بات کرنا کوئی اچنبے کی بات نہیں ، ٹرمپ انتظامیہ کے ساتھ ہمارے اچھے تعلقات ہیں، ٹرمپ نے بھی کہا کہ ہمارے دونوں ممالک کے ساتھ اچھے تعلقات ہیں۔ انڈیا نے ہمیشہ ایسے واقعات کو بنیاد بنا کر پاکستان پر حملہ کیا۔

(جاری ہے)

ماضی میں بھی پوری دنیا کے سامنے ہے جب پاکستان نے ان کے جہاز گرائے اور ابھی نندن کو گرفتار کیا۔

انڈیا کی طرف سے ہمیشہ کوئی نہ کوئی شرارت ہوتی ہے۔ اس کا امکان رہتا ہے کہ انڈیا کوئی نہ کوئی ڈس ایڈونچر کرے گا، پاکستان کسی بھی ایڈونچر کو ڈیل کرنا خوب جانتا ہے۔ عطاء تارڑ نے کہا کہ دوست ممالک جن کو علاقائی اور عالمی امن کے حوالے سے تشویش ہے، ہم نے ان کے سامنے بھی اپنا مئوقف رکھا کہ بھارت نے کس طریقے سے بغیر ثبوت الزام لگا کر پاکستان کو موردالزام ٹھہرایا۔

جبکہ پاکستان کا دور دور تک کوئی تعلق نہیں ہے۔ تمام عالمی میڈیا کہہ رہا ہے کہ بھارت نے بغیر ثبوت پاکستان پر پہلگام واقعے کا الزام لگایا ہے۔ بھارت کی کوشش تھی کہ پاکستان پر الزام لگا کر کوئی نہ کوئی ڈس ایڈونچر کیا جائے۔ پاکستان نے غیرجانبدار تحقیقات کا عندیہ دیا ہے، پاکستان نے تحقیقات کا مطالبہ کرکے بتایا ہے کہ پاکستان کے پاس چھپانے کو کچھ نہیں ہے۔

لیکن انڈیا نے اس کا کوئی جواب نہیں دیا۔ دنیا میں اقوام متحدہ سے لے کر مختلف فورم موجود ہیں ،ایسا فورم جس پر کوئی سوال نہ اٹھا سکے۔ ایسے کسی فورم سے تحقیقات کرائی جاسکتی ہیں۔ ایف آئی آر کو دیکھ لیں 2 بج کر 20منٹ پر واقعہ ختم ہوا اور 2 بج کر 30منٹ پر ایف آئی آر ہوجاتی ہے۔ عطاتارڑ نے کہا کہ اس وقت پاکستان کی سلامتی کا مسئلہ ہے تو جنرل عاصم ملک بڑے قابل افسر ہیں، قومی سکیورٹی ایشوز پر پی ایچ ڈی کی ہوئی ہے۔لیفٹیننٹ جنرل عاصم ملک کو مشیر قومی سلامتی مقرر کرنا وقت کی ضرورت ہے،موجودہ بین الاقوامی سکیورٹی صورتحال اور معاملات کو مزید تقویت ملے گی۔جنرل عاصم ملک کی تعیناتی حکومت کا اچھا اقدام ہے، پاکستان کا کیس مزید مضبوطی سے لڑا جائے گا۔