ہماری امن کی خواہش کو کمزور ی نہ سمجھا جائے، کسی قسم کی مہم جوئی ہوئی تو بھرپور قوت سے جواب دیں گے ، پاکستانی سفیر

دو جوہری طاقتیں آمنے سامنے آئیں توحالات کیا ہوں گے کچھ نہیں کہاجاسکتا، پاکستان نے ہمیشہ ذمہ داری اور صبر و تحمل کا مظاہرہ کیا ہے، رضون سعید شیخ کا امریکی ٹی وی اے بی سی نیوز کو انٹرویو

فیصل علوی جمعہ 2 مئی 2025 14:25

ہماری امن کی خواہش کو کمزور ی نہ سمجھا جائے، کسی قسم کی مہم جوئی ہوئی ..

واشنگٹن(اردوپوائنٹ اخبار تازہ ترین۔02 مئی 2025)امریکہ میں پاکستان کے سفیر رضوان سعید شیخ کا کہنا ہے کہ ہماری امن کی خواہش کو کمزور ی نہ سمجھا جائے،دو جوہری طاقتیں آمنے سامنے آئیں توحالات کیا ہوں گے کچھ نہیں کہاجاسکتا، پاکستان نے ہمیشہ ذمہ داری اور صبر و تحمل کا مظاہرہ کیا ہے، پاکستان پر حملہ ہوا تو بھرپور طاقت سے جواب دیں گے،اے بی سی نیوز کو انٹرویو دیتے ہوئے پاکستانی سفیر نے کہا کہ پہلگام واقعے کے بعد پیدا ہونے والی کشیدہ صورتحال پر پاکستان کا دو ٹوک موقف ہے۔

کسی قسم کی مہم جوئی ہوئی توبھرپورقوت سے جواب دیں گے۔ ہماری معاشی ترقی امن کی متقاضی ہے لیکن ہم باوقار امن پر یقین رکھتے ہیں۔ پہلگام واقعے کے حوالے سے بھارت کی جانب سے تاحال کسی قسم کا کوئی بھی ثبوت پاکستان یا دنیا کے سامنے نہیں رکھا گیا۔

(جاری ہے)

بھارت اپنی جابرانہ پالیسیوں اور انتظامی کوتاہیوں کا بوجھ پاکستان پر نہیں ڈال سکتا۔انہوں نے کہا کہ ہم کسی صورت خطے میں کشیدگی نہیں چاہتے اگر دو جوہری طاقتیں آمنے سامنے آئیں تو حالات کیا شکل اختیار کرتے ہیں اس کے بارے میں کچھ نہیں کہا جا سکتا۔

گفتگو کے دوران پاکستانی سفیر کا مزید کہنا تھا کہ پاکستان دہشت گردی سے سب سے زیادہ متاثرہ ملک ہے، گزشتہ سال پاکستان میں دہشت گردی کے تقریباً ایک ہزار واقعات پیش آئے۔ پاکستان نے دہشت گردی کی عالمی جنگ میں صف اول کا کردار ادا کیا ہے۔ پاکستان نے دہشت گردی کے خلاف جنگ میں ہزاروں جانوں اور اربوں ڈالر کا مالی نقصان بھی اٹھایاہے۔7لاکھ فوج کی موجودگی بھی مقبوضہ کشمیر میں امن کو یقیی نہیں بنا سکتی تو یہ بھارت کیلئے لمحہ فکریہ ہے۔

ان کایہ بھی کہنا تھا کہ بھارت اپنی جابرانہ پالیسیوں، انتخابی مجبوریوں یا انتظامی کوتاہیوں کا بوجھ پاکستان پر نہیں ڈال سکتا۔دریں اثناءاقوام متحدہ میں پاکستان کے مستقل مندوب سفیر عاصم افتخار نے اقوام متحدہ کے سیکرٹری جنرل انتونیو گوتریس سے ملاقات کی۔ملاقات کے دوران ملاقات میں جنوبی ایشیا کی حالیہ کشیدہ صورت حال اور اس کے ممکنہ اثرات پر تفصیلی بات چیت کی گئی۔ پاکستانی مندوب نے زور دیا کہ اسلام آباد خطے میں امن و استحکام کے قیام کیلئے پرعزم ہے اور ہر ممکن سفارتی کوشش جاری رکھے گا۔پاکستانی مندوب کا کہنا تھا کہ بھارت نہ صرف سیاسی مقاصد کیلئے خطرناک بیانیہ اپنا رہا ہے بلکہ علاقائی استحکام کو بھی داﺅ پر لگا رہا ہے۔