اپوزیشن اتحاد تحریک تحفظ آئین پاکستان کا قومی ایجنڈا تیار، نکات سامنے آگئے

اسلام آباد (اُردو پوائنٹ اخبارتازہ ترین - این این آئی۔ 06 مئی2025ء)اپوزیشن اتحاد تحریک تحفظ آئین پاکستان نے قومی ایجنڈا تیار کر لیا جس میں شامل تمام جماعتوں نے اتفاق رائے کیا ہے۔ اپوزیشن اتحاد کے 16نکاتی ایجنڈے میں وجودہ حکومت کے خاتمے سمیت نئے الیکشن اور آئینی ڈھانچے کی تفصیلات شامل ہیں۔ ایجنڈے کے مطابق اپوزیشن 2024کے انتخابات کو مکمل مسترد کرتی ہے اور آزاد الیکشن کمیشن کے تحت نئے انتخابات کا مطالبہ کرتی ہے، اپوزیشن بنیادی آئین حقوق کے نفاذ کا مطالبہ کرتی ہے۔

اپوزیشن پیکا ایکٹ اور آزادی اظہار پر تمام قدغنوں کو مسترد کرتی ہے جبکہ 26ویں آئینی ترمیم ختم کرنے اور پرامن احتجاجی سیاست کی اجازت کا مطالبہ کرتی ہے۔اسی طرح، اپوزیشن موجودہ حکمرانوں کی قانون سازی کو مکمل طور پر مسترد کرتی ہے اور عسکری فورسز کو آئین کی حدود کی پابندی کا مطالبہ کرتی ہے۔

(جاری ہے)

اپوزیشن دہشت گردی کی بھرپور مذمت کرتے ہوئے نیشنل ایکشن پلان کے مکمل نفاذ کا مطالبہ کرتی ہے۔

ایجنڈے میں اپوزیشن نے معاشی مشکلات کے تناظر میں حکومتی اخراجات میں کمی کا مطالبہ کیا ہے جبکہ ٹیکس سے متعلق وہ پالیسیاں جو کاروبار اور مڈل کلاس کو متاثر کرتی ہیں انہیں ختم کرنے کا مطالبہ بھی کیا ہے۔ایجنڈے میں مطالبہ کیا گیا ہے کہ عدلیہ کی آزادی کو یقینی بنایا جائے اور ججز کو ہراساں کرنا بند کیا جائے جبکہ اسلام اباد ہائی کورٹ کے ججز کے خط کو سنجیدہ لیتے ہوئے ٹرانسفر اور پوسٹنگ واپس لی جائے۔

ایجنڈے میں کہا گیا ہے کہ پانی کی تقسیم میں برابری کے اصول کو مد نظر رکھا جائے، اپوزیشن سندھ اور چولستان میں نہروں کو بنانے کے فیصلے مسترد کرتی ہے۔ایجنڈے میں کہا گیا ہے کہ ایس ائی ایف سی کے فیصلے صوبائی خود مختاری پر کاری ضرب ہیں لہٰذا اپوزیشن صوبائی حقوق کے تحفظ کو یقینی بنانے کا مطالبہ کرتی ہے۔ایجنڈے میں مطالبہ کیا گیا ہے کہ جبری گمشدگی کو ختم کیا جائے اور لاپتا افراد کو بازیاب کیا جائے، تمام سیاسی قیدیوں بشمول بانی پی ٹی آئی کو رہا کیا جائے اور کیسز ختم کیے جائیں،انٹرنیٹ سروسز کی پورے ملک میں بلا تعطل فراہمی یقینی بنائی جائے۔

ملک کی 60 فیصد نوجوان نسل کے مستقبل کے لیے طلبہ یونین کو بھی بحال کیا جائے۔ آرٹیکل 140 اے کے تحت لوکل گورنمنٹ کے نظام کو بحال کیا جائے،فلسطین میں قتل عام بند کروانے میں کردار ادا کیا جائے اور افغانستان کے ساتھ مذاکرات کے ذریعے مسائل کا حل تلاش کیا جائے۔مطالبہ کیا گیا ہے کہ ماضی کی غلطیوں کے خمیازے کے لیے ٹروتھ اینڈ ریکنسلییشن کمیشن کا قیام عمل میں لایا جائے جبکہ پاکستان میں اقلیتوں کے حقوق کو تحفظ دیتے ہوئے اسے یقینی بنایا جائے۔