Live Updates

پی ایس ایل 10 کے پلے آف مرحلے میں پہنچنے والی پہلی ٹیم کا فیصلہ ہو گیا

ٹورنامنٹ کے ابتداء میں پوائنٹس ٹیبل پر اوپر رہنے والی اسلام آباد یونائیٹڈ اور لاہور قلندرز کی پلے آف مرحلے تک رسائی تاحال غیر یقینی

محمد علی منگل 6 مئی 2025 18:36

راولپنڈی (اُردو پوائنٹ اخبارتازہ ترین۔ 06 مئی2025ء) پی ایس ایل 10 کے پلے آف مرحلے میں پہنچنے والی پہلی ٹیم کا فیصلہ ہو گیا، ٹورنامنٹ کے ابتداء میں پوائنٹس ٹیبل پر اوپر رہنے والی اسلام آباد یونائیٹڈ اور لاہور قلندرز کی پلے آف مرحلے تک رسائی تاحال غیر یقینی۔ تفصیلات کے مطابق کوئٹہ گلیڈی ایٹرز پاکستان سپر لیگ 10 کے پلے آف مرحلے میں پہنچنے والی پہلی ٹیم بن گئی ۔

کوئٹہ گلیڈی ایٹرز اس وقت 11 پوائنٹس کے ساتھ پوائنٹس ٹیبل پر پہلی پوزیشن پر براجمان ہے، گلیڈی ایٹرز اب تک 8 میں سے 5 میچز جیت چکی ہے اور 11 پوائنٹس کے ساتھ پوائنٹس ٹیبل پر پہلے نمبر پر موجود ہے، جبکہ کوئٹہ کے 2 لیگ میچز اب بھی باقی ہیں۔ دونوں میچز میں شکست کی صورت میں بھی کوئٹہ گلیڈی ایٹرز پلے مرحلے سے باہر نہیں ہو گی۔

(جاری ہے)

جبکہ اسلام آباد یونائیٹڈ 10 پوائنٹس کے ساتھ پوائنٹس ٹیبل پر دوسری پوزیشن پر براجمان ہے، اسلام آباد کے بھی 2 لیگ میچز باقی ہیں۔

اسلام آباد بقیہ دونوں میچز میں شکست کی صورت میں پلے آف مرحلے سے باہر ہو سکتی ہے۔ دوسری جانب کراچی کنگز اور لاہور قلندرز کو پلے آف مرحلے تک رسائی کیلئے مزید 1،1 میچ میں فتح درکار ہے، جبکہ پشاور زلمی کو پلے آف مرحلے تک رسائی کیلئے یا تو 2 فتوحات یا ایک اچھے مارجن سے حاصل کی گئی فتح درکار ہے۔ واضح رہے کہ پاکستان سپر لیگ (پی ایس ایل) 10 کا چھبیسواں میچ کل بروز بدھ کو کوئٹہ گلیڈی ایٹرز اور اسلام آباد یونائیٹڈ کے درمیان راولپنڈی کرکٹ سٹیڈیم میں کھیلا جائے گا۔ میچ رات 8 بجے شروع ہو گا۔