بھارتی میڈیا کا 3 طیاروں کی تباہی کا اعتراف، 7 ہلاکتیں رپورٹ

نئی دہلی ( اُردو پوائنٹ اخبارتازہ ترین۔ 07 مئی 2025ء ) بھارت کی جانب سے 3 طیاروں کی تباہی کا اعتراف کرلیا، 7 ہلاکتیں بھی رپورٹ ہوئی ہیں۔ تفصیلات کے مطابق بھارتی میڈیا نے پاک فوج کی جانب سے اپنے 3 طیاروں کی تباہی کا اعتراف کیا گیا ہے، خبر رساں ایجنسی کا کہنا ہے کہ بھارتی سیکیورٹی ذرائع نے اعتراف کیا کہ پاکستان نے 3 بھارتی لڑاکا طیارے مار گرائے ہیں، اس کے علاوہ مقبوضہ کشمیر میں بھارتی چیک پوسٹوں پر پاکستانی گولہ باری سے 7 ہلاکتیں اور 35 زخمی ہوئے۔

سکیورٹی ذرائع کا کہنا ہے کہ پاکستان نے بھارتی جارحیت کا منہ توڑ جواب دیتے ہوئے اپنی جوابی کارروائی کے دوران بھارتی فوج کا 6 مہار بٹالین ہیڈ کوارٹر تباہ کیا، بھارتی فوج کا یہ 6 مہار یونٹ آزاد کشمیر کی وادی لیپا کے سامنے مقبوضہ کشمیر میں ہے، اس کے علاوہ بھی پاکستان کی جانب سے بھارتی جارحیت کا بھرپور جواب جاری ہے، جس میں پاکستان نے بھارتی فوج کا انفنٹری بریگیڈ ہیڈکوارٹر تباہ کیا، بھارتی فوج کا 12 انفنٹری بریگیڈ 9 ڈویژن اور 15 کور کے زیر کمان ہے۔

(جاری ہے)

بتایا جارہا ہے کہ بھارت نے 6 مقامات پر میزائل حملے کیے جس کے فوری بعد پاکستان نے جوابی کارروائی شروع کردی جس میں 5 طیارے مار گرائے، جن میں 3 رافیل بھی شامل ہیں اور بریگیڈ ہیڈکوارٹرز بھی تباہ کردیا، پاکستانی افواج زمینی اور فضائی طور پر دشمن کو بھرپور نقصان پہنچا رہی ہیں ایک جہاز بھا ٹنڈا میں اور ایک اکھنور میں گرا، ایک اور جہاز اونتی پورا کے قریب تباہ ہوا، پاکستان نے برنالہ سیکٹرمیں بھارتی فوج کا ایک ڈرون بھی مار گرایا، بعد ازاں مزید دو طیارے بھی مار گرائے، یہ طیارے اس وقت مارے گئے جب یہ پاکستان پر بھارتی سر زمین کو استعمال کرکے پاکستان پر حملہ کر رہے تھے، ان طیاروں میں تین رافیل، ایک مگ 29 اور ایک SU30 شامل ہیں۔

معلوم ہوا ہے کہ پاک فوج نے لائن آف کنٹرول پر بھارتی چیک پوسٹوں کو بھاری نقصان پہنچایا، اس دوران پانڈو سکیٹر میں بھارت کی پوسٹ تباہ کردی گئی، موثرجوابی کارروائی میں پانڈو سیکٹر میں بھارت کی چیک پوسٹ جنگل 1 کو تباہ کیا گیا، چیک پوسٹ پرتباہی کےبعد شدید دھواں اٹھ رہا ہے، بھارتی بربریت کا منہ توڑجواب دیا جارہا ہے، پاکستان کی جوابی کارروائیوں کے بعد شکست تسلیم کرتے ہوئے بھارتی فوج نے سفید جھندا لہرا دیا، بھارتی فوج کی جانب سے لائن آف کنٹرول کے چورا کمپلیکس پر سفید جھنڈا لہرایا گیا۔