تقریباً 80 بھارتی فائٹرز نے سرحد پر حملہ کیا، فورسز کو تحمل کا نہ کہا ہوتا تو 5 نہیں 15 طیارے گرتے، نائب وزیراعظم

جس بھارتی فائٹر نے پے لوڈ گرایا، ہم نے صرف اسے ہی نشانہ بنایا، ہم نے پہل نہیں کی لیکن جارحیت کا بھرپور جواب دیا گیا، دشمن کو ترکی بہ ترکی جواب دیں گے؛ اسحاق ڈار کی میڈیا سے گفتگو

ساجد علی بدھ 7 مئی 2025 16:41

تقریباً 80 بھارتی فائٹرز نے سرحد پر حملہ کیا، فورسز کو تحمل کا نہ کہا ..

اسلام آباد ( اُردو پوائنٹ اخبارتازہ ترین۔ 07 مئی 2025ء ) نائب وزیراعظم اور وزیر خارجہ اسحاق ڈار کا کہنا ہے کہ بھارت کے 75 سے 80 فائٹرز نے سرحد پر فائر کیا جس کا جواب دیا گیا، اس دوران ایک گھنٹہ سرحد پر جنگ رہی، جس پر ہماری فضائیہ نے بھرپور ردعمل دیا، نیلم جہلم پراجیکٹ کو بھارت کی جانب سے نشانہ بنانا سنگین خلاف ورزی اور دگنا مجرمانہ ایکٹ ہے۔ پارلیمنٹ میں میڈیا سے گفتگو کرتے ہوئے انہوں نے کہا کہ جس بھارتی فائٹر نے پے لوڈ گرایا، ہم نے صرف اسے ہی نشانہ بنایا جس سے 5 انڈین طیارے گرے، جن میں 3 فائٹر جہاز 2 ان مینڈ کاپٹرز شامل ہیں، ہم نے پہل نہیں کی لیکن جارحیت کا بھرپور جواب دیا گیا، اگر فورسز کو تحمل کا نہ کہا گیا ہوتا تو دشمن کے پانچ نہیں 15 طیارے گرے ہوتے۔

وزیر خارجہ کہتے ہیں کہ انڈیا کے ملین آف ڈالرز کے فائٹرز طیارے مار گرائے ہیں، دشمن کو ترکی بہ ترکی جواب دیں گے پہلے ہی کہا تھا کہ اینٹ کا جواب پتھر سے دیا جائے گا، قوم مسلح افواج کو مستعد رہنے اور جواب دینے پر مبارکباد دیتی ہے، یو این سیکیورٹی کونسل کو خط لکھ کر صورتحال سے آگاہ کیا ہے، رات کے واقعے کے بعد غیر ملکی سفیروں سے بات ہوئی، اسپین کے وزیر خارجہ سے بات ہوئی ہے، او آئی سی کو بھی صورتحال سے آگاہ کیا گیا۔

(جاری ہے)

بتایا جارہا ہے کہ نائب وزیراعظم اسحاق ڈار سے چینی سفیر نے ملاقات کی، اسحاق ڈار نے چینی سفیر جیانگ ژائی ڈونگ کو بھارتی جارحیت سے آگاہ کیا، ترجمان دفتر خارجہ نے بتایا کہ وزیرخارجہ اسحاق ڈار سے ترک سفیر کی ملاقات ہوئی، دونوں فریقین نے علاقائی سلامتی کے خدشات پر تبادلہ خیال کیا، ترک وزیرخارجہ نے بھارت کی بلا اشتعال جارحیت پر پاکستان سے اظہار یکجہتی کیا، دونوں وزرائے خارجہ کا قریبی روابط اورتعاون پراتفاق ہوا، اس کے علاوہ نائب وزیراعظم اسحاق ڈار سے اٹلی کے وزیر داخلہ کی بھی ملاقات ہوئی، وزیر داخلہ پیانٹیدوسی نے پاک بھارت کشیدگی پرتشویش کا اظہار کیا، انہوں نے پاکستان میں معصوم جانوں کے ضیاع پر اظہار افسوس کیا۔