پاکستانی فضائی حدود ہر قسم کی پروازوں کے لیے مکمل طور پر بحال کر دی گئی

ملک کے تمام ائیرپورٹس معمول کے فلائٹ آپریشن کے لیے دستیاب ہیں، ترجمان پاکستان ایئرپورٹس اتھارٹی

محمد علی ہفتہ 10 مئی 2025 19:01

اسلام آباد ( اُردو پوائنٹ اخبارتازہ ترین۔ 10 مئی 2025ء ) پاکستانی فضائی حدود ہر قسم کی پروازوں کے لیے مکمل طور پر بحال کر دی گئی۔ تفصیلات کے مطابق پاکستان اور بھارت کے درمیان سیز فائر ہونے کے بعد پاکستان کی فضائی حدود کی بحالی کے حوالے سے اہم پیش رفت ہوئی ہے۔ میڈیا رپورٹس کے مطابق پاکستان اور بھارت کے درمیان سیز فائر ہونے کی تصدیق ہونے کے بعد جلد ہی پاکستان کی فضائی حدود ہر قسم کی پروازوں کے لیے مکمل طور پر بحال کردی گئی۔

پاکستان ایئرپورٹس اتھارٹی کی جانب سے پاکستان کی فضائی حدود کی بحالی کا نوٹم بھی جاری کردیا گیا۔ ترجمان پاکستان ایئرپورٹس اتھارٹی کے مطابق ملک کے تمام ائیرپورٹس معمول کے فلائٹ آپریشن کے لیے دستیاب ہیں۔ مسافروں سے گزارش ہے کہ اپنی پروازوں کے تازہ ترین شیڈول کے لیے متعلقہ ایئرلائن سے رابطہ کریں۔

(جاری ہے)

جبکہ پاکستان میں فضائی بندش کے خاتمے کے ساتھ ہی پی ائی اے کا آپریشن بحال ہونا شروع ہوگیا۔

پاک بھارت کشیدگی میں کمی کے بعد وزارت مذہبی امور کا بھی اہم بیان سامنے آیا ہے۔ ترجمان وزارت مذہبی امور نے کہا ہے کہ حج پروازیں اب سے شیڈول کے مطابق سعودی عرب روانہ ہوں گی۔ وزارت مذہبی امور کے ترجمان نے ہفتہ کو جاری بیان میں کہا کہ پاکستان کی فضائی حدود ہر قسم کی پروازوں کیلئے مکمل بحال کردی گئی ہے اس لئے حج آپریشن بھی شیڈول کے مطابق بحال ہوگیا ہے۔

ترجمان نے کہا کہ فلائٹ آپریشن کی وقتاً فوقتاً بندش کے باعث مجموعی طور پر 10 حج پروازیں منسوخ ہوئیں،جن میں سے لاہور سے تین، اسلام آباد سے دو جبکہ کراچی اور ملتان سے ایک، ایک حج پرواز منسوخ ہوئی ہے۔ ترجمان وزارت مذہبی امور نے کہا کہ فلائٹس منسوخی کے باعث 2 ہزار 290 عازمین کا شیڈول متاثر ہوا ہے۔ ترجمان وزارت مذہبی امور نے کہا کہ ایک ہزار 277 عازمین کو خصوصی پروازوں کے ذریعے روانہ کیا جاچکا ہے، رہ جانے والے ایک ہزار 13 عازمین کو جلد خصوصی پروازوں کے ذریعے سعودی عرب روانہ کردیا جائے گا- ترجمان وزارت مذہبی امور نے کہا کہ اب تک 19 ہزار 669پاکستانی عازمین سعودی عرب پہنچ چکے ہیں- ترجمان وزارت مذہبی امور نے کہا کہ عازمین حج پروازوں کی معلومات کیلئے متعلقہ حاجی کیمپوں سے رابطے میں رہیں۔