میئرکراچی نے گلشن حدید میں 29ویں امراض قلب کے یونٹ کا افتتاح کردیا

کراچی (اُردو پوائنٹ اخبارتازہ ترین - این این آئی۔ 12 مئی2025ء) میئر کراچی بیرسٹر مرتضیٰ وہاب نے کہا ہے کہ ترقی کی اصل جنگ عوامی زندگی میں بہتری ہے،گلشن حدید بہت بڑا علاقہ ہے اور کراچی کا بارڈر بھی ہے، پاکستان پیپلز پارٹی کی قیادت میں سندھ کا 29واں اور شہر کا 19واں امراض قلب کا یونٹ یہاں قائم کیا گیا ہے،اس یونٹ کی بدولت ایمرجنسی صورتحال میں دل کے مریضوں کی جان بچانا آسان ہوگا، ملیر کی مقامی قیادت کی کوششوں سے آج بڑا مطالبہ پورا ہوا، یہ یونٹ اسپتال پہنچنے سے پہلے جان بچانے کا اہم مرحلہ ہے،لوگوں کو یہاں سے این آئی وی سی ڈی پہنچنے میں گھنٹہ ڈیڑھ گھنٹہ لگتا تھا، دل کی بیماری میں ایک منٹ بھی قیمتی ہوتا ہے، پاکستان پیپلزپارٹی کا منشور ہے کہ لوگوں کو ان کی دہلیز پر صحت کی سہولیات مہیا کی جائیں، ان خیالات کا اظہار انہوں نے گلشن حدید میں ایس آئی سی وی ڈی کے 29 ویں چیسٹ پین یونٹ کی افتتاحی تقریب سے خطاب کرتے ہوئے کیا، اس موقع پر ڈپٹی میئر کراچی سلمان عبداللہ مراد، ایم پی اے ساجد جوکھیو، سٹی کونسل میں ڈپٹی پارلیمانی لیڈر دل محمد اور دیگر پارٹی عہدیدار بھی موجود تھے، میئر کراچی مرتضیٰ وہاب نے کہا کہ گلشن حدید کے اس یونٹ کی بدولت دل کے مریضوں کی جان بچانا آسان ہوگا،ایس آئی سی وی ڈی نے طبی سہولت کو گھر کے قریب پہنچایا،گلشن حدید جیسے دور دراز علاقوں کو ترجیح دے رہے ہیں،گلشن حدید بہت بڑا علاقہ ہے، یہاں انڈسٹریز بھی ہیں اور جامعات اور دیگر تعلیمی ادارے بھی، لوگوں کو یہاں سے امراض قلب کے علاج کے لیے این آئی سی وی ڈی پہنچنے میں گھنٹہ ڈیڑھ گھنٹہ لگتا تھا، شہریوں کو دہلیز پر طبی سہولت دینا ہمارا مشن ہے، انہوں نے کہا کہ عوامی مسائل کے حل کیلئے یوسی چیئرمین متحرک ہیں، میں اپنے تمام منتخب نمائندوں کو خراج تحسین پیش کرتا ہوں، یہاں کے نمائندے گلشن حدید کا مقدمہ لیکر میرے پاس آتے تھے اور انہوں نے کے ایم سی کی خالی عمارت کی نشاندہی کی تھی، مگر صرف بلڈنگ تعمیر کرنے سے ادارے نہیں بنتے، اس بلڈنگ میں اب سیٹلائٹ ایس آئی سی وی ڈی سینٹر بنا دیا گیا ہے، انہوں نے کہا کہ شہری سہولیات کو بہتر بنانے میں جو لوگ ہمارا ساتھ دے رہے ہیں ان کو سلام پیش کرتا ہوں، ہماری ذمہ داری ہے لوگوں کے مسائل حل کریں، میئر کراچی بیر سٹر مرتضی وہاب نے کہا کہ بھارتی جارحیت کا افواج پاکستان نے بہادری کے ساتھ جواب دیا، جنگ کا میدان ہو یا سفارتی میدان، پوری پاکستانی قوم اس کامیابی پر مبارکباد کی مستحق ہے، ہم ایک امن پسند قوم ہیں اور کسی دباؤ میں نہیں آتے، پوری پاکستانی قوم اسی طرح سے متحد ہو کر دشمن کو جواب دے گی، ترقیاتی جنگ اور صحت کے شعبے کی جنگ کو آگے لے جانے کی ضرورت ہے، میئر کراچی بیر سٹر مرتضیٰ وہاب نے کہا کہ عبدالسلام سومرو پارک کی اسکیم بجٹ میں شامل کردی گئی، 50 بیڈ کا اسپتال اور آٹھ لین پل جلد مکمل کریں گے، اسٹاک ایکسچینج پارکنگ روڈ صوبائی حکومت بنارہی ہے، اسٹیل مل کے مسائل حل ہوں تو پانی کا مسئلہ بھی حل ہو جائے گا انہوں نے کہا کہ پاکستان پیپلز پارٹی بلاول بھٹو زرداری کے ویژن کے مطابق شہری سہولیات کو مزید بہتر بنانے کے عزم پر کاربند رہے گی، ترقی کی اصل جنگ عوامی زندگی میں بہتری ہے، بلاول بھٹو کا وژن عوام کو فوری طبی ریلیف دینا ہے، ان کاموں سے لوگوں کی زندگی میں صحت کے حوالے سے بہتری آئے گی۔