دنیا پر پاکستان کے پائلٹس اور لڑاکا طیاروں کی دھاک بیٹھ گئی ہے، زرتاج گل

منگل 13 مئی 2025 17:25

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) قومی اسمبلی میں پی ٹی آئی کی پارلیمانی لیڈر زرتاج گل نےبھارتی جارحیت کا بھرپور اور منہ توڑ جواب دینے پر اپنی مسلح افواج کو سلام پیش کرتے ہوئے کہا ہے کہ پاکستان نے بھارت پر کوئی حملہ نہیں کیا بلکہ جوابی وار کیا ہے، بھارت کے ہوش ٹھکانے آ چکے ہیں، دنیا پر پاکستان کے پائلٹس اور لڑاکا طیاروں کی دھاک بیٹھ گئی ہے۔

وہ منگل کو پارلیمنٹ ہائوس کے باہر میڈیا سے گفتگو کر رہی تھیں۔

(جاری ہے)

ایم این اے زرتاج گل نے کہا کہ پاکستان ایٹمی قوت ہے یہ دنیا جانتی ہے، اب بھارت کے ساتھ سندھ طاس معاہدے، بھارت کے غیر قانونی زیر تسلط جموں و کشمیر سمیت ہر معاملے پر بات ہوگی۔ انہوں نے کہا کہ پاکستان نے بھارت کو بھر پور جواب دے کر اس کا جھوٹ،فریب والا مکروہ چہرہ دنیا کے سامنے بے نقاب کر دیا ہے۔ ایک سوال کے جواب میں زرتاج گل نے کہا کہ مادر وطن کی حفاظت کے لئے سرحدوں پر بیٹھے ہوئے ہر ایک فوجی جوان کو سلیوٹ پیش کرتی ہوں، پاکستان کی مسلح افواج نے جس طرح بھارت کو منہ توڑ جواب دیا اس پر ہم سب کو فخر ہے۔