Live Updates

عالمی طاقتیں دنیا میں امن کی خواہاں ہیں تو کشمیر جیسے دیرینہ تنازع کو نظرانداز کرنا ممکن نہیں، چوہدری شجاعت حسین

منگل 13 مئی 2025 20:10

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) پاکستان مسلم لیگ کے سربراہ اور سابق وزیراعظم چوہدری شجاعت حسین نے کہا ہے کہ اگر عالمی طاقتیں واقعی دنیا میں امن کی خواہاں ہیں تو کشمیر جیسے دیرینہ تنازع کو نظرانداز کرنا ممکن نہیں۔منگل کو جاری کیے گئے اپنے بیان میں انہوں نے خاص طور پر امریکہ کو مخاطب کرتے ہوئے کہا کہ اسے اپنی خارجہ پالیسی میں مسئلہ کشمیر کو ترجیح دینا ہوگی تاکہ جنوبی ایشیا میں پائیدار امن کی بنیاد رکھی جا سکے۔

چوہدری شجاعت حسین نے امریکی صدر کی سیزفائر میں دلچسپی کو سراہتے ہوئے امید ظاہر کی کہ وہ اسی سنجیدگی سے مسئلہ کشمیر کے پائیدار حل میں بھی عملی دلچسپی اور ترجیحی اقدامات اٹھائیں گے۔انہوں نے اس بات پر بھی زور دیا کہ دنیا روس،یوکرین ، اسرائیل اور فلسطین جیسے تنازعات کے حل میں دلچسپی لے رہی ہے تو وہ کشمیر جیسے اہم مسئلے کو بھی نظرانداز نہ کرے۔

(جاری ہے)

چوہدری شجاعت حسین نے دوست ممالک سعودی عرب، چین، ترکیہ، آذربائیجان، متحدہ عرب امارات، ایران، قطر اور دیگر اسلامی ممالک کا بھی شکریہ ادا کیا جنہوں نے پاکستان اور کشمیری عوام کے موقف کی ہمیشہ حمایت کی اور ہر ایشو میں بھرپور ساتھ دیا اور آخر میں مطالبہ کیا کہ عالمی طاقتیں مصلحتوں سے بالاتر ہو کر خطے میں انصاف پر مبنی پالیسی اپنائیں۔