بلڈ اینڈ انوسٹ پاکستان ایکسپو -2025 ملک میں سرمایہ کاری کے فروغ کا باعث بنے گی ، مرزا اختیار بیگ

اسلام آباد (اُردو پوائنٹ اخبارتازہ ترین - اے پی پی۔ 14 مئی2025ء) ممتاز کاروباری رہنما اور رکن قومی اسمبلی ڈاکٹر مرزا اختیار بیگ نے پاکستان کی تاجر برادری کی حمایت اور قومی اقتصادی ترقی میں اس کے کردار کو اجاگر کرنے کے اپنے پختہ عزم کا اعادہ کیا ہے۔ بدھ کو اسلام آباد چیمبر آف کامرس اینڈ انڈسٹری (آئی سی سی آئی) میں ایک بڑے اجتماع سے خطاب کرتے ہوئے ڈاکٹر مراز اختیار بیگ نے کمیونٹی کے عزم کی تعریف کی اور اقتصادی ترقی اور غیر ملکی سرمایہ کاری کو فروغ دینے کے لئے چیمبر کے اقدامات میں مکمل تعاون کا اظہار کیا۔

انہوں نے اس بات پر زور دیا کہ وہ کاروباری برادری کے تحفظات کو تمام متعلقہ فورمز پر اٹھاتے رہیں گے تاکہ بروقت حل، کاروبار کرنے میں آسانی اور غیر ملکی براہ راست سرمایہ کاری کو راغب کرنے کے لئے سازگار ماحول کو یقینی بنایا جا سکے۔

(جاری ہے)

انہوں نے بزنس فرینڈلی ماحول پیدا کرنے میں آئی سی سی آئی کی کوششوں کو سراہا اور مسقط، عمان میں جون 2025 میں ہونے والی آئندہ بلڈ اینڈ انویسٹ پاکستان ایکسپو کے کامیاب انعقاد کے لئے اپنے مکمل تعاون کا یقین دلایا۔

انہوں نے پاکستان کی مسلح افواج کو زبردست خراج تحسین پیش کیا، ملک کی حفاظت اور قومی سلامتی کو لاحق خطرات کو ختم کرنے میں ان کی غیر متزلزل لگن اور قربانیوں کا اعتراف کیا۔آئی سی سی آئی کے صدر ناصر منصور قریشی نے حاضرین کو چیمبر کے اہم اقدامات اور اقتصادی سرگرمیوں کو فروغ دینے میں اس کے اہم کردار کے بارے میں آگاہ کیا۔ انہوں نے کہا کہ بلڈ اینڈ انویسٹ پاکستان ایکسپو خلیجی خطے کے ساتھ مضبوط تجارتی اور اقتصادی روابط قائم کرتے ہوئے پاکستان کی صنعتی، رئیل اسٹیٹ اور سرمایہ کاری کی صلاحیت کو اجاگر کرنے کے لیے ایک اسٹریٹجک پلیٹ فارم کے طور پر کام کرے گی ۔

صدر آئی سی سی آئی نے کہا کہ چیمبر معاشی بہبود کو اجاگر کرنے میں ہمیشہ آگے رہا ہے اور یہ ایکسپو پاکستانی کاروبار کو بین الاقوامی منڈیوں سے جوڑنے کے ہمارے مشن کا اعادہ ہے۔فیڈریشن آف پاکستان چیمبرز آف کامرس اینڈ انڈسٹری کے صدر عاطف اکرام شیخ نے آئی سی سی آئی کی کوششوں کو سراہا۔ انہوں نے مسلح افواج کو قوم کی حفاظت میں اہم کردار ادا کرنے پر خراج تحسین بھی پیش کیا۔

آئی سی سی آئی کے گروپ لیڈر طارق صادق نے ڈاکٹر بیگ پر زور دیا کہ وہ آنے والی ایکسپو کے زیادہ سے زیادہ اثر کو بڑھانے کے لیے کراچی کے کاروباری اداروں کو بھی ان بورڈ کریں۔ایف پی سی سی آئی کے سابق صدر عبدالرؤف عالم اور یونائیٹڈ بزنس گروپ (یو بی جی) کے سیکرٹری جنرل ظفر بختاوری نے ڈاکٹر بیگ کی انتھک کوششوں اور قیادت کو سراہتے ہوئے ملکی اور بین الاقوامی سطح پر کاروباری برادری کے امیج کو بلند کرنے میں ان کے کردار کو سراہا۔

آئی سی سی آئی کے سابق صدر میاں اکرم فرید نے ڈاکٹر بیگ کو قومی اسمبلی میں کاروباری مفادات کا حقیقی نمائندہ قرار دیا۔شکریہ کا ووٹ پیش کرتے ہوئے آئی سی سی آئی کے سینئر نائب صدر عبدالرحمان صدیقی نے پائیدار اقتصادی پالیسیوں کو یقینی بنانے کے لئے نجی شعبے اور حکومت کے درمیان ایک مضبوط وکیل کے طور پر کام جاری رکھنے کے چیمبر کے عزم کا اعادہ کیا۔تقریب میں آئی سی سی آئی کے نائب صدر ناصر محمود چوہدری، کونسل ممبران محمد اعجاز عباسی اور میاں شوکت مسعود سمیت تاجر رہنمائوں کے ایک معزز اجتماع نے شرکت کی اور ایگزیکٹو ممبران فاطمہ عظیم، شمائلہ صدیقی، عرفان چوہدری، روحیل انور بٹ، آفتاب گجر، ذوالقرنین عباسی، عمران منہاس، اسحاق سیال اور دیگر نے شرکت کی۔