Live Updates

گورنرسندھ کامران خان ٹیسوری نے گورنرہائوس میں یاد گار شہداء ’’ بنیان المرصوص کا سنگ بنیاد رکھا

شہداء کے درجات کی بلندی کی دعا بھی کی، ہماری افواج نے دنیا بھر میں پاکستان کا سر فخر سے بلند کر دیا ہے ،میڈیا سے گفتگو

جمعرات 15 مئی 2025 18:48

کراچی (اُردو پوائنٹ اخبارتازہ ترین - این این آئی۔ 15 مئی2025ء)گورنر سندھ کامران خان ٹیسوری نے گورنرہائوس میں یادگار شہداء "بنیان المرصوص" کا سنگ بنیاد رکھا ۔اس موقع پر شہداء کے درجات کی بلندی کے لئے دعائیں کی۔ یادگار شہداء ، آپریشن "بنیان المرصوص" کے افتتاح کے بعد میڈیا سے گفتگو کرتے ہوئے گورنرسندھ نے کہا کہ ہماری افواج نے دنیا بھر میں پاکستان کا سر فخر سے بلند کیا ہے۔

آپریشن بنیان المرصوص کی تاریخی کامیابی کا سہرا افواجِ پاکستان کے جوان، افسران اور قیادت کو جاتا ہے۔انہوں نے مزید کہا کہ بھارت خطے میں بالادستی قائم کرنا چاہتا تھا، مگر افواج پاکستان نے اس کے عزائم کو خاک میں ملا دیا۔10 مئی کا معرکہ حق ایک ناقابلِ فراموش دن ہے، جو ہمیشہ یاد رکھا جائے گا۔

(جاری ہے)

انہوں نے کہا کہ پاکستان ایک امن پسند ملک ہی؛ ہم جنگ نہیں، بلکہ استحکام اور ترقی کے خواہاں ہیں۔

انہوں نے کہا کہ پاکستان، مسئلہ کشمیر پر کبھی سمجھوتہ نہیں کرے گا، اور بھارت کے یکطرفہ آبی فیصلے بھی قبول نہیں کئے جائیں گے۔ہم مودی کی انتہا پسند سوچ کے مخالف ہیں، نہ کہ بھارتی عوام کے۔انہوں نے کہا کہ بیرونی سرمایہ کاری کو فروغ دے کر ہمیں اپنی معیشت کو مزید مستحکم کرنا ہے۔پاکستان کو آئی ایم ایف کے قرضوں کے چنگل سے نکال کر خودمختاری کی راہ پر ڈالنا ہوگا۔انہوں نے کہا کہ بوہرہ کمیونٹی نے پاکستان کے قرض اتارنے میں تعاون کی پیشکش کی ہے، جس پر ہم ان کے تہہ دل سے شکر گزار ہیں۔پاکستانی بزنس کمیونٹی ترکیہ سمیت تمام دوست ممالک کے ساتھ تجارتی روابط مزید مستحکم کرے۔