پاکستان نے بھارتی جارحیت کا مؤثر جواب دیا، عالمی برادری نے مؤقف کی بھرپور حمایت کی،سینیٹر اسحاق ڈار

اسلام آباد (اُردو پوائنٹ اخبارتازہ ترین - اے پی پی۔ 15 مئی2025ء) نائب وزیراعظم اور وزیر خارجہ سینیٹر محمد اسحاق ڈار نے کہا ہےکہ پاکستان نے بھارتی جارحیت کا مؤثر جواب دیا، پلوامہ کے جھوٹے بیانیے سے لے کر حالیہ جارحیت تک بھارت کا چہرہ بے نقاب ہو چکا ہے ،عالمی برادری نے مؤقف کی بھرپور حمایت کی۔جمعرات کو ایوان بالا کے اجلاس میں انہوں نے کہا کہ بھارت کی جانب سے کابینہ کمیٹی برائے سکیورٹی کے اجلاس اور اس کے بعد جاری اعلامیہ نے خطے میں کشیدگی پیدا کی، اس صورتحال کا فوری نوٹس لیتے ہوئے پاکستان نے نیشنل سکیورٹی کمیٹی کا ہنگامی اجلاس طلب کیا اور بھارتی جارحیت کے جواب میں فوری اور مؤثر اقدامات کئے۔

انہوں نے کہا کہ پاکستان کی دفاعی کارروائیوں میں بھارتی مشن کی تعداد کم کی گئی جبکہ مخصوص دفاعی سٹیجز کو نشانہ بنایا گیا، واہگہ بارڈر کو عارضی طور پر بند کر دیا گیا، بھارتی شہریوں کے وزٹ اور تجارتی ویزے معطل کر دیئے گئے، البتہ مذہبی مقاصد کے لئے آنے والے سکھ یاتریوں کو استثنیٰ دیا گیا۔

(جاری ہے)

انہوں نے کہا کہ انڈین ایئرلائنز کے لئے پاکستانی فضائی حدود بند کر دی گئی اور بین الاقوامی سطح پر پاکستان کے مؤقف کو بھرپور حمایت ملی، اقوام متحدہ کی سلامتی کونسل کے مستقل اور غیر مستقل ارکان نے پاکستان سے براہ راست رابطہ کیا جبکہ دنیا بھر کے 60 سے زائد وزرائے خارجہ اور اعلیٰ حکام نے پاکستان سے رابطہ کر کے تحمل کی تلقین کی۔

سینیٹر اسحاق ڈار نے کہا کہ پاکستان نے بھارتی اشتعال انگیزی کا منہ توڑ جواب دیا مگر مزید کشیدگی سے گریز کیا، عالمی برادری کو واضح پیغام دیا گیا کہ پاکستان جنگ نہیں چاہتا لیکن اپنے دفاع کا حق ہر صورت محفوظ رکھتا ہے۔ انہوں نے مزید کہا کہ بھارتی میڈیا کی جانب سے پلوامہ جیسے واقعات کو بنیاد بنا کر لگائے گئے الزامات بے بنیاد ہیں اور پاکستان نے ہر عالمی فورم پر یہ مؤقف واضح کیا ہے کہ ہم دہشت گردی کے خلاف ہیں اور خطے میں امن و استحکام کے لئے ہر ممکن اقدام کر رہے ہیں۔

انہوں نے کہا کہ بھارت نے 6 اور 7 مئی کی درمیانی شب پاکستان کے مختلف علاقوں پر حملے کئے، ان حملوں میں پنجاب کے چار اور آزاد کشمیر کے دو مقامات کو نشانہ بنایا گیا، مجموعی طور پر بھارت کی جانب سے 24 حملے کئے گئے۔اسحاق ڈار نے کہا کہ جن مقامات کو نشانہ بنایا گیا انہیں بھارتی حکومت اور میڈیا کی جانب سے دہشت گردوں کے ٹھکانے قرار دیا گیا مگر زمینی حقائق اس بیانیے کی مکمل تردید کرتے ہیں، حملوں میں دو مساجد کو شہید کیا گیا جبکہ چار دیگر شہری و عباداتی مقامات کو بھی شدید نقصان پہنچا۔

نائب وزیر اعظم نے عالمی برادری کو براہ راست دعوت دی کہ وہ پاکستان آ کر خود ان مقامات کا معائنہ کرے جنہیں بھارت نے دہشت گردی سے جوڑا، ہم پوری دنیا کو دعوت دیتے ہیں کہ آئیں اور اپنی آنکھوں سے دیکھیں کہ کون سے مقامات دہشت گردی کے ٹھکانے تھے، اصل حقیقت بھارت کا جھوٹ اور ظلم ہے۔انہوں نے کہا کہ بھارت کے ان اقدامات سے نہ صرف پاکستان کی خودمختاری کو چیلنج کیا گیا بلکہ عالمی قوانین، انسانی حقوق اور مذہبی آزادی کی سنگین خلاف ورزی بھی کی گئی، پاکستان نے ان حملوں کا معاملہ اقوام متحدہ، او آئی سی اور دیگر بین الاقوامی اداروں کے سامنے اٹھانے کا فیصلہ کیا ہے۔

سینیٹر اسحاق ڈار نے کہا کہ بھارت نے 2019 میں پلوامہ حملے کے بعد انٹرنیشنل کمیونٹی کو گمراہ کرنے کی کوشش کی اور پاکستان کو جھوٹے الزامات کا نشانہ بنایا۔ ان کا کہنا تھا کہ اس وقت بھارت کے جھوٹے بیانیے کو عالمی سطح پر توڑنا پاکستان کے لئے ایک اہم چیلنج تھا۔انہوں نے کہا کہ وزیراعظم شہباز شریف نے حالیہ اکیڈمی خطاب میں بھارت کو دوٹوک جواب دینے کی پالیسی واضح کی۔

اس پالیسی کے تحت پاکستان نے یو این چارٹر کے آرٹیکل 51 کے تحت اپنے دفاع کا حق استعمال کیا، بھارت کی جانب سے چار جنگی طیارے پاکستانی حدود کی طرف روانہ کئے گئے جس پر پاک فضائیہ الرٹ رہی اور دشمن کو پسپائی اختیار کرنا پڑی۔انہوں نے کہا کہ 6 مئی کی رات بھارت نے 80 جنگی طیارے لانچ کئے جن میں SU-30 اور MIG-29 جیسے طیارے شامل تھے، ان حملوں میں 24 پے لوڈ پاکستانی حدود میں گرائے گئے لیکن ان کا کوئی ہدف دہشت گردی سے متعلق نہ تھا، نشانہ عام شہری علاقے اور مذہبی مقامات بشمول دو مساجد بنیں۔

انہوں نے کہا کہ پاکستانی طیاروں کو واضح ہدایات دی گئی تھیں کہ اگر دشمن فضائی حدود عبور کرے تو فوری کارروائی کی جائے۔پاکستان نے بھارت کے 80 ڈرونز گرائے، 7 مئی کو بھارت کو فضائی محاذ پر شرمناک ناکامی کا سامنا کرنا پڑا۔سینیٹر اسحاق ڈار نے افواجِ پاکستان کی پیشہ وارانہ مہارت، چوکسی اور قومی جذبے کو خراج تحسین پیش کیا اور بتایا کہ سینیٹ میں ایک قرار داد پیش کی جا رہی ہے جس میں افواج پاکستان کی شاندار کارکردگی کو سراہا جائے گا ۔انہوں نے کہا کہ موجودہ دور حکومت میں پاکستان نے بڑی سفارتی کامیابیاں حاصل کی ہیں جس کا دنیا اعتراف کر رہی ہے۔ انہوں نے کہا کہ حکومت نے پاک بھارت جنگ کے شہداء اور زخمیوں کیلئے پیکیج کا اعلان کیا ہے۔