Live Updates

’حفاظت تیری ہم کریں گے وطن، تیری زمیں کی قسم تیرے آسماں کی قسم‘

آئی ایس پی آر نے راحت فتح علی خان کی آواز میں نیا پرجوش ملی نغمہ جاری کر دیا

ساجد علی ہفتہ 17 مئی 2025 16:15

’حفاظت تیری ہم کریں گے وطن، تیری زمیں کی قسم تیرے آسماں کی قسم‘

راولپنڈی ( اُردو پوائنٹ اخبارتازہ ترین۔ 17 مئی2025ء ) پاک فوج کے شعبہ تعلقات عامہ (آئی ایس پی آر) نے آپریشن بنیان مرصوص میں پاک افواج کی شاندار فتح اور کامیابی پر معروف گلوکار راحت فتح علی خان کی آواز میں نیا پُرجوش ملی نغمہ جاری کردیا۔ تفصیلات کے مطابق نئے ملی نغمہ میں وطن عزیزی کی حفاظت اپنی جانوں سے بھی بڑھ کر کرنے کا عزم کیا گیا ہے، اس نغمہ میں شامل بول ’حفاظت تیری ہم کریں گے وطن، تیری زمیں کی قسم تیرے آسماں کی قسم‘ سننے والے کے لہو گرما دیتے ہیں، نغمے کے بول میں شامل ’پاکستان کا مطلب کیا لَا الہ الا اللہ محمد رسول اللہ‘ ریاست طیبہ کی ترجمانی کرتے ہیں جو دشمن کے دل پر ہیبت طاری کرتے ہیں، اس ملی نغمہ کی دل چھو لینے والی شاعری اور موسیقی پاکستانی کے دل کی آواز ہیں۔

(جاری ہے)

اس سے پہلے پاکستان اور بھارت کے درمیان جاری کشیدہ علاقائی صورتحال کے پیشِ نظر پاکستانی قوم کے جذبات کی عکاسی کرتا ایک ملی نغمہ ” لڑنے کیلئے تیار ہیں ہم“ ریلیز کیا گیا تھا، جس نے سننے والوں کے دلوں میں جوش و ولولہ بھر دیا، نغمہ میں شامل شاعری دل کو گرما دینے والی ہے، جس کی سحر انگیز آواز نے سننے والوں کو جذبے، عزم اور فخر کے ایک نئے احساس سے روشناس کرایا، اس ملی ترانے کے بول ’غالب ہیں خدا کا وار ہیں ہم ، لڑنے کے لیے تیار ہیں ہم‘، ہر پاکستانی کی زبان پر آ گئے، یہ نغمہ ناصرف ایک فنی شاہکار ہے بلکہ دشمن کو بھی یہ واضح پیغام دیتا ہے کہ پاکستان ایک ایسی قوم ہے جو دینِ اسلام کے نام پر بنی اور اس کی فوج ایمان، تقویٰ اور جہاد فی سبیل اللہ کو اپنا موٹو سمجھتی ہے۔

ترانے میں بھارت کے جنگی جنون کو للکارتے ہوئے بتایا گیا کہ دشمن شاید بھول چکا ہے کہ وہ کس قوم سے ٹکرا رہا ہے، پاکستان کی مسلح افواج ہر محاذ پر برق رفتاری، جدید اسلحے اور سخت ترین تربیت کے ساتھ ہمہ وقت تیار ہیں، یہ ملی نغمہ پاک فوج کی بہادری، قربانی اور قومی اتحاد کی ترجمانی کرتا ہے، جو ریلیز ہوتے ہی قوم کے ہر فرد کے دل کی آواز بن چکا ہے، اس میں بار بار گونجنے والا ”اللہ اکبر“ کا نعرہ سننے والوں کے دلوں میں ایک نئی جرات، حوصلہ اور بھرپور ہمت پیدا کردیتا ہے۔