برائٹ انٹرنیشنل کالج میں ورلڈ نرسنگ ڈے اور قومی ہیروز کو خراجِ تحسین پیش کرنے کی تقریب کا انعقاد

پیر 19 مئی 2025 17:58

لاہور (اُردو پوائنٹ اخبارتازہ ترین - اے پی پی۔ 19 مئی2025ء) برائٹ انٹرنیشنل کالج الائیڈ ہیلتھ نرسنگ کالج فیڈریشن کے زیرِ اہتمام ورلڈ نرسنگ ڈے اور حالیہ ملکی صورتحال میں پاک فوج اور قومی بیانیہ کو موثر انداز میں دنیا بھر میں اجاگر کرنے والے کرداروں کو خراجِ تحسین پیش کرنے کے لیے ایک پروقار تقریب کا انعقاد کیا گیا۔ تقریب میں نرسنگ کے شعبے سے وابستہ افراد، طالبات، اساتذہ، سول سوسائٹی کے نمائندوں اور مختلف شعبہ ہائے زندگی سے تعلق رکھنے والی شخصیات کی بڑی تعداد نے شرکت کی۔

تقریب کی مہمانِ خصوصی وفاقی وزیر اطلاعات و نشریات عطااللہ تارڑ کی والدہ ساجدہ فاروق تارڑ تھیں۔تقریب میں حالیہ پاک بھارت کشیدگی کے دوران بین الاقوامی میڈیا پر پاکستان کے موقف کو دلیرانہ انداز میں پیش کر کے قومی بیانیہ کو تقویت دینے پر وفاقی وزیر اطلاعات و نشریات عطااللہ کو خراج تحسین پیش کیا گیا۔

(جاری ہے)

ان کی اس جرأتمندانہ کاوش کو سراہتے ہوئے تقریب میں ان کی والدہ کی باقاعدہ ’’تاج پوشی‘‘ کی گئی۔

شرکا نے کھڑے ہو کر زبردست تالیوں سے ان کو خراجِ تحسین پیش کیا۔تقریب میں رکنِ پنجاب اسمبلی بی بی وڈیری، ڈاکٹر ثانیہ کھیڑا، رابعہ افضل، عطیہ قریشی، خالد منہاس اور محمود دھوتڑ سمیت دیگر نے شرکت کی۔مقررین نے اپنے خطابات میں نرسنگ کے شعبے میں کام کرنے والے افراد، خاص طور پر خواتین نرسز کے کردار کو سراہا اور ان کی خدمات کو قوم کے لیے سرمایہ قرار دیا۔

ساجدہ فاروق تارڑ نے خطاب کرتے ہوئے کہا کہ پاکستان اس وقت اندرونی و بیرونی چیلنجز سے نبرد آزما ہےلیکن ہمارے سپہ سالار نے دشمن کے جارحانہ عزائم کے مقابلے میں غیر معمولی حکمتِ عملی اور حوصلے کا مظاہرہ کرتے ہوئے آپریشن بنیان مرصوص لانچ کر کے بھارتی عزائم کو خاک میں ملا دیا ۔ انہوں نے کہا کہ ہمیں اپنی افواج پر فخر ہے ،جو ہر میدان میں دشمن کا ڈٹ کر مقابلہ کر رہی ہیں۔تقریب کے دوران مختلف پرفارمنسز، ملی نغمے اور تقاریر بھی پیش کی گئیں، جنہوں نے ماحول کو مزید پرجوش اور حب الوطنی سے بھرپور بنا دیا۔ اختتام پر طلبہ و طالبات میں میڈلز اور اسناد تقسیم کی گئیں جبکہ مہمانِ خصوصی کو اعزازی شیلڈز بھی پیش کی گئیں۔