پاکستان اور آئی ایم ایف کے درمیان نئے بجٹ پر مذاکرات جاری

حکومت کی نان فائلرز کے گرد گھیرا تنگ کرنے کی یقین دہانی ‘ گاڑیاں، جائیداد کی خریداری پر پابندی ‘ ٹرانزیکشن نہیں کرسکیں گے

پیر 19 مئی 2025 20:08

اسلام آباد(اُردو پوائنٹ اخبارتازہ ترین - آن لائن۔ 19 مئی2025ء)پاکستان اور آئی ایم ایف کے درمیان نئے بجٹ پر مذاکرات جاری ہیں اورحکومت کی طرف سے نان فائلرز کے گرد گھیرا تنگ کرنے کی یقین دہانی کرائی گئی ہے اورنان فائلرز کیلئے گاڑیاں، جائیداد کی خریداری پر پابندی ہوگی۔ذرائع ایف بی آرکے مطابق نان فائلرزمالی لین دین کی ٹرانزیکشن نہیں کرسکیں گے، نئے بجٹ میں نان فائلرز کیلئے آسانی نہیں بلکہ مزید سختی ہوگی۔

ذرائع کے مطابق ٹیکس سسٹم سے نان فائلرز کی کیٹگری ختم کرنے پر کام جاری ہے۔

(جاری ہے)

آئی ایم ایف کو بریفنگ میں بتایا گیا کہ تاجر دوست اسکیم اپنے اہداف پورے نہیں کر سکتی، غیر رجسٹرڈ دوکانداروں پر ودہولڈنگ ٹیکس بڑھانے کے مثبت نتائج ملے، تاجروں، ہول سیلرز کیٹگری میں فائلرز کی تعداد میں 51 فیصد اضافہ ہو۔ذرائع کے مطابق ٹیکس نادہندگان کے بارے میں تھرڈ پارٹی ڈیٹا کا تجزیہ جاری ہے، ٹیکس نظام کو موئژ بنانے کیلئے اقدامات کیئے جارہے ہیں، اسلام آباد، کراچی، لاہور میں کمپلائنس رسک مینجمنٹ سسٹم فعال کر دیا گیا۔ذرائع کے مطابق اس نظام کو کارپوریٹ ٹیکس یونٹس تک بھی موثر توسیع دی جائے گی۔