Live Updates

مہنگے فون نہیں، جان بچانے کیلئے ہتھیار ضروری ہے، آفاق احمد

مقامی پولیس کے بغیر کراچی کے شہری غیر محفوظ رہینگے،چیئرمین مہاجرقومی موومنٹ

پیر 19 مئی 2025 22:15

کراچی(اُردو پوائنٹ اخبارتازہ ترین - این این آئی۔ 19 مئی2025ء)مہاجرقومی موومنٹ کے چیئر مین آفاق احمد گزشتہ روز ڈاکوئوں کے ہاتھوں شہید ہونے والے شاہ فہد اور محمد امین کے گھر گئے اور انکے لواحقین سے علیحدہ علیحدہ تعزیت کی اور دعاکی۔دونوں جگہ آفاق احمد کے پہنچتے ہی علاقے مکینوں کی بڑی تعداد جمع ہوگئی اوربڑھتی ہوئی جرائم پیشہ سرگرمیوں میں انسانی جانوں کے نقصاں پر شدید غم وغصے کا اظہار کیا اور آفاق احمد سے شہریوں کی جان ومال کے تحفظ کیلئے اپنا کردار ادا کرنے کی اپیل کی۔

آفاق احمد نے کہامہاجر قومی موومنٹ اپنے شہر اور شہریوں کے حق میں ہرسطح پر آواز اٹھارہی ہے اوراٹھاتی رہیگی۔ انہوں نے کہا کہ جب تک تھانے فروخت ہوتے رہینگے اور پولیس قیام امن کے بجائے رقوم بٹورنے کو اپنی ڈیوٹی سمجھے گی،کراچی پورے ملک کے جرائم پیشہ افرادکی جنت بنا رہیگا۔

(جاری ہے)

آفاق احمد نے کہا کہ کراچی ملکی معیشت میں کلیدی کردارادا کرتا ہے اسے مزید تباہ کرنے کے بجائے مقامی لوگوں کو انکاشہر سنبھالنے کیلئے پولیس میں بھرتی کیا جائے۔

آفاق احمد نے وکلا برادری سے اپیل کی ہے کہ جو ڈاکوکراچی کے معصوم شہریوں کے قتل میں ملوث ہیں ناصرف انکے کیسز کی پیروی سے گریز کرے بلکہ انہیں انکے جرم کی سزا دلانے میں اپنا ہر ممکن کردارادا کریں۔ انہوں نے مزید کہا کہ مقامی پولیس کے بغیر کراچی کے شہری غیر محفوظ رہینگے،انہیں اس وقت مہنگے فون کی نہیں جان بچانے کیلئے ہتھیاروں کی ضرورت ہے،وفاقی اور صوبائی حکومتوں نے ہتھیاروں کے لاکھوں لائسنس پاکستان کے شہریوں کو فصلوں کے کیڑے مارنے کیلئے جاری نہیں کئے اپنی حفاظت کیلئے جاری کئے ہیں کراچی کے شہری غیر محفوظ ہیں وہ بھی لائسنس اور ہتھیارکے حصول کو یقینی بنائیں۔