Live Updates

یہ جنگ مختصر لیکن انتہائی خطرناک تھی، ہم نے 1971ء کی جنگ کا بدلہ لے لیا

دہشتگرد اغیار کے ایجنٹ ہیں، بلوچستان کے بھٹکے لوگوں کو واپس لانےکی کوشش کرنی چاہیے، وزیراعظم کا بلوچستان کیلئے 250 ارب روپے کا ترقیاتی فنڈ مختص کرنے کا اعلان

ثنااللہ ناگرہ ہفتہ 31 مئی 2025 20:38

کوئٹہ (اُردو پوائنٹ اخبارتازہ ترین۔ 31 مئی 2025ء) وزیراعظم شہباز شریف نے کہا ہے کہ یہ جنگ مختصر لیکن انتہائی خطرناک تھی، ہم نے 1971ء کی جنگ کا بدلہ لے لیا ، دہشتگرد اغیار کے ایجنٹ ہیں، بلوچستان کے بھٹکے لوگوں کو واپس لانے کی کوشش کرنی چاہیے۔ انہوں نے کوئٹہ میں گرینڈ جرگے سے خطاب کرتے ہوئے کہا کہ ہم نے بھارت سے 1971ء کی جنگ کا بدلہ لے لیا ہے، دشمن کو ایسا جواب دیا ہے کہ وہ کبھی نہیں بھولے گا، 7، 6 اور 10مئی کو بھارت نے پاکستان پر حملہ کیا، یہ جنگ مختصر لیکن انتہائی خطرناک تھی۔

فیلڈ مارشل عاصم منیر نے مثالی قیادت کا مظاہرہ کیا۔ عسکری قیادت نے جنگ میں کامیابی سے پوری قوم کا سرفخر سے بلند کردیا ہے۔ پوری قوم چٹان کی طرح افواج پاکستان کے ساتھ کھڑی ہے۔ پاکستان کی کامیابی سے دوست ممالک میں خوشی کی لہر دوڑ گئی ہے۔

(جاری ہے)

انہوں نے کہا کہ بلوچستان کی ترقی پاکستان کی ترقی ہے، بلوچستان کے لوگ بہت دلیر لوگ ہیں، این ایف سی ایوارڈ پر ہم نے لاہور میں بات کی اور گوادر میں دستخط کئے۔

2010 میں متفقہ این ایف سی ایوارڈ منظور ہوا۔ دہشتگرد اغیار کے ایجنٹ ہیں۔ وزیراعظم نے کوئٹہ میں گرینڈ جرگے سے خطاب کرتے ہوئے کہا کہ کوشش ہونی چاہیے ترقیاتی پروگرام کے یہ فنڈز شفافیت کے ساتھ خرچ ہو۔انہوں نے کہا کہ بلوچستان کے عمائدین بتائیں کون سی خرابیاں ہیں جنہیں دور کرنے کی ضرورت ہے، بلوچستان کے جو لوگ بھٹک کر پٹری سے اتر گئے ہیں انہیں واپس لانے کی کوشش کرنی چاہیے۔

شہباز شریف نے کہا کہ دہشت گرد خون کے پیاسے ہیں وہ پاکستان کی ترقی اور خوشحالی نہیں چاہتے، دہشت گرد دشمنوں کے ایجنٹ ہیں۔ انہوں نے کہا کہ بھارت کے 5 دھماکوں کے مقابلے میں 6 دھماکے کیے، بھارت سے 1971 کا بدلہ لیا ہے، پوری قوم چٹان کی طرح افواج پاکستان کے ساتھ کھڑی ہوگئی، بھارت کو شکست دی جو وہ عمر بھر یاد رکھے گا۔ وزیراعظم نے بلوچستان کیلئے 250 ارب روپے کا ترقیاتی فنڈ مختص کرنے کا اعلان کرتے ہوئے کہا کہ یہ رقم ملک کے مجموعی ایک ہزار ارب روپے کے ترقیاتی فنڈ کا ایک چوتھائی ہوگی، دہشت گرد خون کے پیاسے ہیں وہ پاکستان کی ترقی اور خوشحالی نہیں چاہتے، دہشت گرد دشمنوں کے ایجنٹ ہیں۔

اس موقع پر وزیراعلیٰ بلوچستان سرفراز بگٹی نے کہا مٹھی بھر عناصر دہشت گردی کے ذریعے ترقی کے عمل کو روکنا چاہتے ہیں، دہشت گرد ٹولہ بھارت کے کہنے پر معصوم لوگوں کا خون بہا رہا ہے، دہشت گردی سے بلوچستان متاثر ہو رہا ہے۔ سرفراز بگٹی نے کہا کہ یہ عناصر اپنے بیرونی آقاؤں کی ایما پر کارروائیاں کرتے ہیں۔ وزیراعلیٰ بلوچستان نے کہا کہ گرین بلوچستان انیشیٹو سے بلوچستان کے لوگوں کو روزگار کے مواقع ملیں گے۔