Live Updates

احسن ایازآئندہ ماہ امریکہ میں اٹلانٹا اوپن اورآفتاب جاوید سکواش ایونٹ میں شرکت کریں گے

منگل 20 مئی 2025 14:29

اسلام آباد(اُردو پوائنٹ اخبارتازہ ترین - این این آئی۔ 20 مئی2025ء)پاکستان کے مایہ ناز سکواش کے کھلاڑی احسن ایاز آئندہ ماہ امریکہ میں ہونے والے اٹلانٹا اوپن اور آفتاب جاوید میموریل مینز اوپن ایونٹ میں ایکشن میں نظر آئیں گے۔25-2024 پی ایس اے سکواش ٹور کے دوران کولی ویل اوپن میں فتح حاصل کرنے کے بعد اپنا دوسرا پی ایس اے ٹائٹل جیتنے والے احسن ایاز نے گفتگو کرتے ہوئے کہا کہ وہ 26 ویں اٹلانٹا اوپن ٹورنامنٹ جو 4 سے 8 جون تک کھیلا جائے گا اور آفتاب جاوید میموریل مینز اوپن جو ہوسٹن میں 11 سے 15 جون تک شیڈول ہے میں شرکت کریں گے۔

انہوں نے کہا کہ میں ٹورنامنٹس کے لئے مکمل طور پر تیار ہوں اور دونوں ایونٹس میں اپنی بہترین کارکردگی کی بدولت ملک کا نام روشن کروں گا۔احسن ایازکو کھیلوں میں ان کی خدمات کے اعتراف میں ایچ بی ایل پی ایس ایل ہمارے ہیروز ایوارڈ سے نوازا گیا۔

(جاری ہے)

پشاور سے تعلق رکھنے والے سکواش چیمپئن احسن ایاز کو رواں سال کے اوائل میں صوبائی دارالحکومت میں منعقد ہونے والی چھٹی میٹرکس پاکستان یوتھ سمٹ کے دوران پرائڈ آف خیبر پختونخوا ایوارڈ 2025 سے بھی نوازا گیا۔

امریکی سکواش لیول 3 کے سرٹیفائیڈ کوچ احسن ایاز اس وقت ہوسٹن، امریکہ میں مقیم ہیں۔انہوں نے ایسنسیا بزنس سکول (یو اے ای) سے پروجیکٹ مینجمنٹ میں ایم بی اے اور پشاور یونیورسٹی سے ریاضی اور کمپیوٹر سائنس میں بیچلر کی ڈگری حاصل کی۔ انہوں نے کہا کہ میں نہ صرف ایک ایتھلیٹ کے طور پر بلکہ ملک کے نوجوانوں کے لئے ایک انسان دوست اور سرپرست کے طور پر بھی پاکستان کا نام روشن کرنا چاہتا ہوں۔

واضح رہے کہ گزشتہ سال احسن ایاز کو کراچی کے نیشنل بینک سٹیڈیم میں ایچ بی ایل پاکستان سپر لیگ (پی ایس ایل) سیزن 9 کے فائنل میں مہمان خصوصی کے طور پر مدعو کیا گیا تھا، جس میں اسلام آباد یونائیٹڈ نے آخری گیند پر سنسنی خیز مقابلے میں ملتان سلطانز کو 2 وکٹوں سے شکست دی تھی۔اپنی ایتھلیٹک کامیابیوں کے علاوہ، وہ انسان دوستی کے لئے گہری وابستگی رکھتے ہیں، وہ جگر اور گردے کی بیماریوں سے لڑنے والے مریضوں کی فعال طور پر حمایت کرتے ہیں اور پسماندہ نوجوانوں کو بااختیار بنانے کے لئے کام کرتے ہیں۔ اپنی بااثر سوشل میڈیا موجودگی کے ذریعے وہ پاکستان میں ذہنی صحت سے متعلق آگاہی اور کھیلوں کے کلچر کے فروغ کی حمایت کرتے ہیں۔