پی ٹی آئی عدم اعتماد لانے کا شوق پورا کر لے، ناکامی کے سوا کچھ نہیں ملے گا‘عظمیٰ بخاری

لاہور (اُردو پوائنٹ اخبارتازہ ترین - این این آئی۔ 20 مئی2025ء) وزیر اطلاعات و ثقافت پنجاب عظمیٰ بخاری نے کہا ہے کہ پی ٹی آئی اگر عدم اعتماد لانے کا شوق پورا کرنا چاہتی ہے تو کر لے، لیکن اس کوشش سے اسے ناکامی کے سوا کچھ حاصل نہیں ہوگا،پی ٹی آئی اپنے سوشل میڈیا ٹائیگرز کو مطمئن کرنے کے لیے صرف خان کے باہر آنے کی تاریخیں دیتی رہتی ہے۔ یہ بات انہوں نے ڈی جی پی آر میں ایک اہم پریس کانفرنس کے دوران کہی۔

فیصل واوڈا کے بارے میں انہوں نے کہا کہ کوئی بھی انہیں سنجیدگی سے نہیں لیتا، جبکہ نجم سیٹھی کی ''چڑیا'' اب عمر رسیدہ ہو چکی ہے اور اس کا ذہنی توازن بھی بگڑ چکا ہے۔پنجاب حکومت کے اقدامات کا ذکر کرتے ہوئے عظمیٰ بخاری نے کہا کہ حکومت نے پہلی بار اپنے ایم پی ایز کی رہائشی یا کاروباری جگہوں پر قائم تجاوزات کا خاتمہ کیا ہے۔

(جاری ہے)

انہوں نے مزید کہا کہ مریم نواز کا آسان کاروبار منصوبہ ایک گیم چینجر ہے، جس کے تحت 57 ہزار نئے کاروباروں نے ترقی کا نیا دروازہ کھولا ہے۔

ان کا یہ بھی کہنا تھا کہ تمام بڑے بازاروں میں گاڑیوں کا داخلہ بند کر دیا گیا ہے اور ہر بازار کے باہر الیکٹرک کارٹس کی سہولت فراہم کی جائے گی۔ انہوں نے کہا کہ وزیراعلیٰ پنجاب مریم نواز کی قیادت میں پنجاب عوامی فلاح و بہبود کے منصوبوں میں سب سے آگے ہے۔ پاکستان کی تاریخ کی سب سے بڑی کاروباری اسکیم ’’آسان کاروبار اسکیم‘‘وزیراعلیٰ مریم نواز کا انقلابی اقدام ہے، جو عوام کو معاشی خودمختاری کی جانب لے جا رہا ہے۔

انہوں نے بتایا کہ اس اسکیم کے تحت صرف تین ماہ میں ایک لاکھ سات ہزار سے زائد افراد کو اکسٹھ ارب روپے کے بلا سود قرضے فراہم کیے گئے۔ ان قرضوں سے ستاون ہزار نو سو تیرہ نئے کاروبار شروع ہو چکے ہیں، جن میں چھ ہزار سات سو ترپن خواتین بھی شامل ہیں، جنہوں نے تین ارب روپے سے زائد رقم بطور قرض حاصل کی۔انہوں نے مزید کہا کہ پنجاب کے مختلف اضلاع میں تجاوزات کے خلاف مہم کا آغاز کر دیا گیا ہے، جس کے تحت فیصل آباد میں چھ ہزار ایکڑ زمین واگزار کروائی گئی ہے۔

گوجرانوالہ میں شہریوں نے از خود تجاوزات ختم کر کے مثبت مثال قائم کی ہے۔ عظمیٰ بخاری نے بتایا کہ تمام بازاروں میں گاڑیوں کے داخلے پر پابندی عائد کر دی گئی ہے اور ان کی جگہ الیکٹرک کارٹس متعارف کروائی جا رہی ہیں تاکہ شہریوں کو آسانی ہو اور ماحول کو آلودگی سے بچایا جا سکے۔انہوں نے حسین آگاہی بازار، فرید گیٹ اور دیگر تاریخی مقامات کو خوبصورت بنانے کے حکومتی ارادوں سے بھی آگاہ کیا اور کہا کہ ان جگہوں پر ٹف ٹائلز اور پھولوں کی سجاوٹ کے ذریعے ان مقامات کو سیاحتی و تجارتی مرکز بنایا جائے گا۔

وزیر اطلاعات نے کہا کہ وزیراعلیٰ مریم نواز نے آٹے کی قیمت میں کمی اور شہروں کی صفائی میں تاریخی اقدامات کیے ہیں۔ انہوں نے پہلی مرتبہ ڈسٹرکٹ ایڈمنسٹریشن کے سالانہ ترقیاتی منصوبوں کی منظوری بھی چھ گھنٹے کی طویل میٹنگ میں دی۔