سوشل میڈیا پر ہیش ٹیگ ’فیلڈ مارشل فاتح حق عاصم منیر‘ ٹاپ ٹرینڈ بن گیا

عوام کی جانب سے فیلڈ مارشل سید عاصم منیر کو زبردست خراج تحسین پیش کیا جارہا ہے

ساجد علی بدھ 21 مئی 2025 11:28

اسلام آباد ( اُردو پوائنٹ اخبارتازہ ترین۔ 21 مئی 2025ء ) سوشل میڈیا پر ہیش ٹیگ #فیلڈمارشل_فاتح_حق_عاصم_منیر ٹاپ ٹرینڈ بن گیا۔ تفصیلات کے مطابق وفاقی حکومت کی جانب سے جنرل سید عاصم منیر کی فیلڈ مارشل کےعہدے پر تقرری کی گئی ہے، فیلڈ مارشل کےعہدے کی تقرری پر سوشل میڈیا صارفین کی جانب سے مبارکباد کے پیغامات جاری ہیں اور #فیلڈمارشل_فاتح_حق_عاصم_منیر سوشل میڈیا پر ٹاپ ٹرینڈ بن چکا ہے جہاں عوام کی جانب سے فیلڈ مارشل سید عاصم منیر کو زبردست خراج تحسین پیش کیا جارہا ہے کیوں کہ فیلڈ مارشل سید عاصم منیر کی قیادت میں افواج پاکستان نے دشمن کو منہ توڑ جواب دیا، سوشل میڈیا پر یہ ٹرینڈ ہر پاکستانی کے دل کی آواز اور اپنے سپہ سالار سے محبت کی عکاس ہے۔

بتایا جارہا ہے کہ وزیراعظم شہباز شریف کی زیرصدارت وفاقی کابینہ کے اجلاس میں معرکہ حق آپریشن بنیان مرصوص کی اعلیٰ حکمتِ عملی اور دلیرانہ قیادت کی بنیاد پر ملک کی سلامتی کو یقینی بنانے اور دشمن کو شِکست فاش دینے پر حکومت پاکستان کی جانب سے جنرل سید عاصم منیر کو فیلڈ مارشل کے عہدے پر ترقی دینے کی منظوری دی گئی، اس کے علاوہ حکومت نے ائیر چیف مارشل ظہر احمد بابر سدھو کی مدت ملازمت پوری ہونے پر ان کی خدمات کو جاری رکھنے کا بھی متفقہ فیصلہ کیا۔

(جاری ہے)

معلوم ہوا ہے کہ وزیراعظم شہباز شریف نے صدر مملکت آصف علی زرداری سے ملاقات کرکے انہیں اس فیصلے کے حوالے سے اعتماد میں لیا، جب کہ وفاقی کابینہ کے اجلاس میں افواج پاکستان کے افسران و جوان، غازیوں، شہداء اور مختلف شعبوں سے تعلق رکھنے والے پاکستانی شہریوں کو آپریشن بنیان مرصوص کے دوران ان کی گراں قدر خدمات کے اعتراف میں اعلیٰ سرکاری ایوارڈز دینے کا بھی فیصلہ کیا گیا۔

فیلڈ مارشل عاصم منیر نے فیلڈ مارشل کا اعزاز ملنے پر پوری قوم سے اظہار تشکر کیا، ان کا کہنا تھا کہ فیلڈ مارشل کا اعزاز ملنے پر اللّٰہ تعالیٰ کا شکر گزار ہوں، یہ اعزاز پوری قوم، افواجِ پاکستان، خاص کر سول اور ملٹری شہداء اور غازیوں کے نام وقف کرتا ہوں، صدر پاکستان، وزیرِ اعظم اور کابینہ کے اعتماد کا شکر گزار ہوں، یہ اعزاز قوم کی امانت ہے جس کو نبھانے کے لیے لاکھوں عاصم بھی قربان ہیں، یہ انفرادی نہیں بلکہ افواجِ پاکستان اور پوری قوم کے لیے اعزاز ہے۔