مودی کی ہندوتوا پالیسیوں اور جنگی جنون سے جنوبی ایشیاء کے امن کو خطرہ ہے، صدر آزاد کشمیر بیرسٹر سلطان محمود چوہدری

مظفر آباد (اُردو پوائنٹ اخبارتازہ ترین - اے پی پی۔ 21 مئی2025ء) صدر آزاد جموں وکشمیر بیرسٹر سلطان محمود چوہدری نے کہا ہے کہ مودی کی ہندوتوا پالیسیوں اور جنگی جنون کی وجہ سے جنوبی ایشیاء کے امن کو خطرہ ہے۔مودی سرکار نے مقبوضہ کشمیر کے اندر پہلگام میں فالس فلیگ آپریشن کو بنیاد بنا کر اپنے سیاسی فائدے کے لئے پاکستان پر حملہ کرتے ہوئے بے گناہ شہریوں کی املاک کو نشانہ بنایا اور معصوم لوگوں کو شہید کیا،پاک افواج نے بھارت کی جنگی جارحیت کا منہ توڑ جواب دیا ، بھارت کے جنگی جنون کو خاک میں ملایا اور بھارت کو گھٹنے ٹیکنے پر مجبور کر دیا، پاک فوج کی اس فتح پر پوری قوم پاک افواج کو سلام پیش کرتی ہے۔

ان خیالات کااظہار انہوں نے جامعہ پونچھ کے چھوٹا گلہ کیمپس کا سنگ بنیاد رکھنے کی تقریب سے بطور مہمان خصوصی خطاب کرتے ہوئے کیا۔

(جاری ہے)

انہوں نے کہا کہ میں آج یہاں شہیدوں اور غازیوں کی دھرتی راولاکوٹ سے مقبوضہ کشمیر کے عوام کو یقین دلاتا ہوں کہ آزادی کی جدوجہد میں وہ تنہا نہیں اور آزادکشمیر کا بچہ بچہ اُن کے شانہ بشانہ ہے اور ہماری یہ جدوجہد مقبوضہ کشمیر کی آزادی تک جاری رہے گی۔

انہوں نے کہا کہ ہماری پاک فوج اور پاک فضائیہ ہمہ وقت ملکی سرحدوں کی حفاظت اور دشمن کی کسی بھی جارحیت کا جواب دینے کے لئے تیار ہیں اور پاکستانی اور کشمیری قوم پاک فوج کے ساتھ شانہ بشانہ کھڑی ہیں۔ میرے لیے یہ باعث فخر ہے کہ میں آج منتخب عوامی نمائندوں اور معززین علاقہ کی موجودگی میں جامعہ پونچھ راولاکوٹ کے (چھوٹا گلہ کیمپس) کا سنگ بنیاد رکھ رہا ہوں، اس منصوبے کا افتتاح میرے لیے ایک خواب کے ساتھ چیلنج بھی تھا۔

میں اس موقع پر وائس چانسلر جامعہ پونچھ پروفیسر ڈاکٹر ذکریا ذاکر اور اُن کی ٹیم کو مبارکباد دیتا ہوں کہ انہوں نے اس منصوبے کو دوبارہ شروع کرنے کے لئے طویل جدوجہد کی اور مجھے امید ہے کہ 3.5ارب روپے کی لاگت سے تعمیر ہونے والا یہ پروجیکٹ جامعہ پونچھ کی تدریسی اور تحقیقی سرگرمیوں میں اہم تبدیلیوں کا باعث بنے گا ،یہ منصوبہ اس علاقے کی معاشی سرگرمیوں میں بھی ترقی لانے کے لئے اہم ثابت ہو گا۔

انہوں نے کہا کہ ہمارے لیے سب سے قابل فخر بات یہ ہے کہ ہم قوم کے مستقبل اور آج کی نوجوان نسل پر بھاری سرمایہ کاری کر رہے ہیں اور یہی ہماری حکومت کی اولین ترجیح ہے کیونکہ نوجوان ہی ہمارا مستقبل ہیں اور نوجوانوں پر سرمایہ کاری دراصل اس قوم کے روشن مستقبل کے لئے سرمایہ کاری ہے۔ اس مقصد کے لئے حکومت نے اعلیٰ تعلیم کے شعبہ میں بھاری سرمایہ کاری کی ہے، اس وقت آزاد کشمیر میں اعلیٰ تعلیم کے فروغ کے لئے 6پبلک سیکٹر یونیورسٹیز موجود ہیں جن میں ہزاروں کی تعداد میں طلبہ و طالبات انتہائی پرامن اور سازگار ماحول میں معیاری تعلیم حاصل کر رہے ہیں۔

صدر آزاد کشمیر نے کہا کہ میں کویت فنڈ فار عرب اکنامک ڈویلپمنٹ کا خصوصی طور پر شکریہ ادا کرتا ہوں جن کے تعاون سے ہم اس منصوبے کو تکمیل تک پہنچانے کے لئے پر عزم ہیں۔ اس موقع پر تقریب میں سابق صدر آزادکشمیر سردار محمد یعقوب خان، ممبر آزادجموں وکشمیر قانون ساز اسمبلی سردار حسن ابراہیم خان، سابق وزیر حکومت سردار عابد حسین عابد،وائس چانسلر جامعہ پونچھ پروفیسر ڈاکٹر ذکریا ذاکر،صدارتی مشیر سردار امتیاز خان اور دیگر بھی موجود تھے۔

وائس چانسلر جامعہ پونچھ پروفیسر ڈاکٹر ذکریا ذاکر نے چھوٹا گلہ کیمپس کے پروجیکٹ پر صدر آزادکشمیر و چانسلر آزاد جموں وکشمیر جامعات بیرسٹر سلطان محمود چوہدری کو بریفنگ بھی دی۔اس سے قبل صدر آزاد کشمیر بیرسٹر سلطان محمود چوہدری نے چھوٹا گلہ کیمپس کے سنگ بنیاد رکھنے کے موقع پرتختی کی نقاب کشائی بھی کی۔