امریکا نے واشنگٹن میں فائرنگ کے دوران مارے جانے والے اسرائیل کے سفارت خانے کے اہلکاروں کی شناخت ظاہر کردی

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔ 22 مئی ۔2025 )امریکہ میں اسرائیل کے سفارت خانے نے واشنگٹن میں ہلاک ہونے والے جوڑے کی شناخت ظاہر کرتے ہوئے ان کا نام یارون اور سارہ بتایا ہے اسرائیلی ذرائع ابلاغ کے مطابق ان کے پورے نام یارون لیشنسکی اور سارہ ملگرام ہیں. سفارت خانے نے” ایکس” پر پیغام میں کہا ہے کہ متاثرین اپنی زندگی کے ابتدائی دور میں تھے ایک دہشت گرد نے ا نہیں گولی مار کر اس وقت ہلاک کر دیا جب وہ واشنگٹن میں کیپیٹل جیوئش میوزیم میں ایک تقریب سے باہر نکل رہے تھے.

سفارت خانے کا کہنا ہے کہ ان کا عملہ اس قتل سے دل برداشتہ اور پریشان ہے امریکی نشریاتی ادارے کے مطابق پولیس نے واشنگٹن میں اسرائیلی سفارتخانے کے اہلکاروں پر حملے کرنے والے کی شناخت ایلائس روڈریگز کے نام سے کی ہے پریس کانفرنس کے دوران پولیس نے بتایا کہ 30 سالہ حملہ آور شکاگو کا رہائشی ہے حکام کا کہنا ہے کے حملے سے قبل روڈریگز کو میوزیم کے باہر بے چینی سے ٹہلتے ہوئے دیکھا گیا تھا.

پولیس کا کہنا ہے کہ حملہ اور چار افراد کے ایک گروپ کی جانب بڑھا اور بندوق نکال کر دو افراد کو قتل کر دیا روڈریگز اب حراست میں ہے وشنگٹن ڈی سی کے میئر باﺅزر کا کہنا ہے کہ فی الحال کوئی خطرہ نہیں ہے واشنگٹن پولیس چیف پامیلا سمتھ کا کہنا ہے کہ دورانِ جراست روڈریگز نے آزاد فلسطین، آزاد فلسطین‘ کے نعرے لگائے. ان کا کہنا ہے کہ حملہ آور کے ماضی کے ریکارڈ میں ایسا کچھ نہیں تھا کہ وہ پولیس کے ریڈار پر ہوتا ایف بی آئی کے واشنگٹن فیلڈ آفس کے اسسٹنٹ ڈائریکٹر سٹیو جینسن کا کہنا ہے تفتیش کے دوران کسی بھی ممکنہ دہشت گردی کے امکان کو بھی دیکھا جائے گا ان کا کہنا تھا کہ یہ بھی دیکھا جائے گا کہیں حملے کی وجہ نفرت پر مبنی جرم تو نہیں.

قبل ازیںامریکی حکام نے بتایا تھا کہ واشنگٹن ڈی سی میں اسرائیلی سفارتخانے کے دو اہلکاروں کو گولی مار کر ہلاک کر دیا گیا ہے مارے جانے والوں میں ایک مرد اور ایک خاتون شامل ہیں۔

(جاری ہے)

ان افراد کی شناخت ظاہر نہیں کی گئی . سی بی ایس نیوز کے مطابق دونوں افراد کو اس وقت نشانہ بنایا گیا جب وہ کیپیٹل جوئش میوزیم میں ہونے والی ایک تقریب میں شرکت کے بعد باہر نکل رہے تھے اس علاقے میں متعدد سیاحتی مقامات، میوزیم اور حکومتی عمارتیں ہیں جن میں ایف بی آئی کا واشنگٹن فیلڈ آفس بھی شامل ہے فائرنگ کے وقت اسرائیلی سفارتخانے کے متعدد اہلکار میوزیم میں ہونے والی اس تقریب میں موجود تھے.

امریکی ہوم لینڈ سکیورٹی چیف کرسٹی نوم نے” ایکس“ پر بتایاکہ اسرائیلی سفارتخانے کے دو اہلکاروں کو واشنگٹن میں جوئش میوزیم کے باہر قتل کر دیا گیا ہے ان کا کہنا تھا کہ ہم اس واقعے میں ملوث مجرم کو کیفرکردار تک پہنچائیں گے دوسری جانب اقوامِ متحدہ میں اسرائیل کے مندوب ڈینی ڈینن نے اس واقعے کو یہود مخالف دہشت گردی قرار دیتے ہوئے کہا ہے کہ یہودی کمیونٹی اور سفارتی عملے کو نقصان پہنچانا ریڈ لائن ہے انہوں نے امید ظاہر کی کہ امریکی حکام اس مجرمانہ واقعے میں ملوث افراد کے خلاف سخت کارروائی کریں گے.