Live Updates

آصفہ بھٹو زرداری کے قافلے پر ہونے والا حملہ بزدلانہ فعل ہے ،ذوالفقار بسرا

محترمہ آصفہ بھٹو زرداری کے قافلے پر حملے کی فوری اور صاف شفاف انکوائری کروائی جائے

پیر 26 مئی 2025 16:52

نیویارک(اُردو پوائنٹ اخبارتازہ ترین - این این آئی۔ 26 مئی2025ء)نائب صدر پاکستان پیپلزپارٹی امریکہ ذوالفقار بسرا نے خاتون اول ممبر قومی اسمبلی آصفہ بھٹو زرداری کے قافلے پر حملہ کرنے کی شدید الفاظ میں مذمت کی ہے اپنے جاری کردہ بیان میں ذوالفقار بسرا نے کہا کہ شہید محترمہ بینظیر بھٹو کی صاحبزادی،جرات وعزم کی علامت عکس بینظیر آصفہ بھٹو زرداری کے قافلے پر ہونے والا حملہ بزدلانہ فعل ہے یہ حملہ نہ صرف ایک فرد پر بلکہ جمہوری اقدار،سیاسی برداشت اور عوامی شعور پر حملہ ہے۔

انھوں نے مزید کہا کہ خاتون اول آصفہ بھٹو زرداری اپنے عظیم والدین کے مشن کی آمین ہیں ان پر حملہ دراصل ان نظریات پر حملہ ہے جو اس ملک کو جمہوریت،رواداری اور عوامی خدمت کی راہ پر گامزن دیکھنا چاہتے ہیں۔

(جاری ہے)

انھوں نے مزید کہا کہ آصفہ بھٹو زرداری پارلیمان میں عوام کی توانا آواز ہیں جنھوں نے ہمیشہ اپنی والدہ محترمہ کے نقش قدم پر چلتے ہوئے معاشرے کے پسے ہوئے طبقات کی نمائندگی کی اور ان کی آواز بنیں۔

مجھ سمیت پاکستان پیپلزپارٹی کا ہر کارکن ہر رہنما ہر لیڈر خاتون اول دختر بینظیر عکس بینظیر محترمہ آصفہ بھٹو زرداری کے ساتھ سیسہ پلائی دیوار کی طرح کھڑا ہے ہم بھرپور مطالبہ کرتے ہیں کہ محترمہ آصفہ بھٹو زرداری کے قافلے پر حملے کی فوری اور صاف شفاف انکوائری کروائی جائے اور ذمہ دار عناصر کو فی الفور کیفرکردار تک پہنچایا جائے تاکہ آئندہ کبھی ایسا واقعہ رونما نہ ہو سکے۔