وزیراعلیٰ پنجاب کا چکن کی بڑھتے نرخوں پر سخت اظہار برہمی، فوری قیمتیں کنٹرول کرنے کی ہدایت

عید الاضحی سے قبل ضروری سبزیوں کے نرخ بڑھنا قطعاً قابل برداشت نہیں، ذخیرہ اندوزی کرکے سبزیوں کے نرخ بڑھانے کی ہرگز اجازت نہیں دی جائے گی۔ وزیراعلیٰ مریم نوازشریف

ثنااللہ ناگرہ بدھ 28 مئی 2025 19:28

وزیراعلیٰ پنجاب کا چکن کی بڑھتے نرخوں پر سخت اظہار برہمی، فوری قیمتیں ..

لاہور (اُردو پوائنٹ اخبارتازہ ترین۔ 28 مئی 2025ء) وزیراعلیٰ پنجاب مریم نوازشریف نے پنجاب میں چکن کے نرخ بڑھنے پر سخت اظہار برہمی کیا ہے، وزیراعلیٰ مریم نوازشریف نے خصوصی اجلاس میں چکن کے نرخ بڑھنے پر ناراضگی کا اظہار کرتے ہوئے متعلقہ ڈیپارٹمنٹس کو چکن کی پرائس کنٹرول کرنے کیلئے اقدامات کرنے کا حکم دیا- وزیراعلی مریم نوازشریف نے عید الاضحی سے قبل ٹماٹر، پیاز، ادرک، لہسن، مرچ اور لیموں کے نرخ پر نظر رکھنے کی ہدایت کی ہے، وزیراعلی مریم نوازشریف نے کہا کہ عید الاضحی سے قبل ضروری سبزیوں کے نرخ بڑھنا قطعاً قابل برداشت نہیں۔

ذخیرہ اندوزی کر کے سبزیوں کے نرخ بڑھانے کی ہرگز اجازت نہیں دی جائے گی۔ حکومتی اداروں کی موجودگی کے باوجود چکن کے نرخ بڑھنا قطعی ناقابل قبول ہے۔

(جاری ہے)

وزیراعلیٰ مریم نوازشریف نے سبزیوں، دالوں، آٹا اور روٹی کے نرخ پر بریفنگ لی۔ وزیراعلیٰ مریم نواز شریف نے آٹے کے نرخ میں کمی آنے پر روٹی کی قیمت کم کرنے کیلئے اقدامات کی ہدایت کی- وزیراعلیٰ مریم نوازشریف نے سبزیوں کی ٹرانسپوٹیشن کے اخراجات کم کرنے کیلئے پلان طلب کر لیا۔

وزیراعلیٰ مریم نوازشریف نے ایگری کلچر ڈیپارٹمنٹ کو بے موسمی سبزیاں اگانے کیلئے اقدامات کی بھی ہدایت کی- مزید برآں نعرہ تکبیر، اللہ ھو اکبر،وزیراعلیٰ پنجاب مریم نوازشریف نے یوم تکبیر پر اپنے پیغام میں پاکستانی قوم اورامت مسلمہ کو مبارکباددی ہے- وزیراعلی مریم نوازشریف نے کہاکہ 27 سال گزر گئے مگرآج پاکستانی قوم کا سر فخر سے بلند ہے اورسربلند رہے گا۔

دشمن پاکستان کی سرزمین کی طرف میلی نظر سے دیکھنے کی جرات نہیں کرسکتا۔پاکستان کا ایٹمی قوت بننا پوری امت مسلمہ کا فخر ہے۔ وزیراعلی مریم نوازشریف نے کہاکہ اللہ تعالیٰ کے فضل و کرم سے پاکستان کوپوری دنیا میں پہلی مسلمان ایٹمی قوت بننے کا اعزاز حاصل ہوا۔ 10مئی کی فتح کی بنیاد 28 مئی 1998ء کو رکھی گئی۔ 28مئی کو چاغی کے پہاڑوں میں لگائے نعرہ تکبیر کی گونج آج بھی وطن عزیز کی فضاؤں میں موجود ہیں۔ وزیراعلی مریم نوازشریف نے کہا کہ قوم آج بھی پاکستان مسلم لیگ (ن) کے قائد محمدنوازشریف کی ممنون ہیں۔ دشمن کو جب بھی منہ توڑ جواب ملا، پاکستان مسلم لیگ (ن) کی حکومت تھی، ایٹمی دھماکے پرامن اورمحفوظ پاکستان کی ضمانت ہیں۔