Live Updates

پی ایس ایل فائنل ‘ کیا گلیڈی ایٹرز کپتان کی وجہ سے ہاری‘ شدید تنقید جاری

بدھ 28 مئی 2025 21:47

لاہور(اُردو پوائنٹ اخبارتازہ ترین - آن لائن۔ 28 مئی2025ء)پاکستان سپر لیگ (پی ایس ایل) میں کوئٹہ گلیڈی ایٹرز کی فرنچائز کو کپتان سعود شکیل کی ناقص فارم کی وجہ سے کڑی تنقید کا نشانہ بنایا جانے لگا۔قومی ٹیم کے مڈل آرڈر بیٹر سعود شکیل رواں پی ایس ایل سیزن میں کوئٹہ گلیڈی ایٹرز کی کپتانی کے فرائض نبھارہے تھے تاہم وہ 12 میچز کی 11 اننگز میں کوئی ففٹی تک اسکور نہ کرسکے۔

سعود شکیل محض کپتان ہونے کے باعث کوئٹہ گلیڈی ایٹرز کے اسکواڈ کا حصہ رہے جبکہ اس دوران جارح مزاج کرکٹر خواجہ نافع کو صرف مواقع مل سکے، پہلے میچ میں وہ کراچی کنگز کیخلاف 1 اور دوسرے میچ میں انہوں نے ملتان سلطانز کیخلاف 51 رنز کی اننگز کھیلی تاہم اسکے باوجود انہیں بینچ پر بٹھادیا گیا۔جارح مزاج اوپنر کو فائنل میں بینچ پر بٹھائے جانے پر گلیڈی ایٹرز کے فینز نے کپتان سعود شکیل کو آڑے ہاتھوں لیا۔

(جاری ہے)

سوشل میڈیا پلیٹ فارمز پر شائقین کرکٹ نے تنقید کرتے ہوئے کہا کہ نوجوان کرکٹر خواجہ نافع کو موقع دینے کے بجائے سعود شکیل خود اوپنر آئے، جس کے باعث ٹیم کو نقصان ہوا۔واضح رہے کہ پی ایس ایل فائنل میں کوئٹہ گلیڈی ایٹرز کے کپتان سعود شکیل محض 4 رنز بناکر پویلین لوٹ گئے تھے جبکہ اس میچ میں حسن نواز نے 76 رنز کی اننگز کھیل کر ٹیم کو 200 رنز کے ہندسے تک پہنچایا تھا۔