قومی اسمبلی کی قائمہ کمیٹی برائے اطلاعات و نشریات کا اجلاس ،بہادر مسلح افواج کی پیشہ ورانہ مہارت کو خراج تحسین پیش کرنے کی قرارداد متفقہ طور پر منظور

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) قومی اسمبلی کی قائمہ کمیٹی برائے اطلاعات و نشریات نے بھارتی جارحیت کو پسپا کرنے اور ملک کی خودمختاری کے دفاع پر پاکستان کی بہادر مسلح افواج کی پیشہ ورانہ صلاحیتوں کو خراج تحسین پیش کرنے کی قرارداد متفقہ طور پر منظور کرلی۔ قرارداد میں افواج پاکستان کے ساتھ مکمل یکجہتی کا اظہار کرتے ہوئے قومی سلامتی کے تحفظ میں پاک فوج کے کردار کو سراہا گیا۔

کمیٹی نے پاک بھارت کشیدگی کے دوران پاکستان کے وزیراعظم کے قائدانہ کردار کو بھی سراہا اور حالیہ بحران کے دوران حقائق پر مبنی اور ذمہ دارانہ کوریج کرنے، دشمن کی طرف سے پھیلائی جانے والی جعلی خبروں اور پروپیگنڈے کا مقابلہ کرنے میں پاکستان کے نجی اور سرکاری میڈیا کے موثر کردار کو بھی سراہا گیا۔

(جاری ہے)

کمیٹی نے امن کے قیام کے لئے پاکستان کے عزم کا اعادہ کرتے ہوئے کہا کہ ہر جارحیت کا بھرپور، موثر اور پیشہ ورانہ جواب دیا جائے گا۔

کمیٹی کا اجلاس جمعرات کو پی ٹی وی ہیڈ کوارٹرز اسلام آباد میں رکن قومی اسمبلی پلین بلوچ کی زیر صدارت منعقد ہوا۔ اجلاس میں پی ٹی وی سے متعلق امور پر بھی تفصیلی غور کیا گیا۔ کمیٹی نے پی ٹی وی انتظامیہ کو ہدایت کی کہ آئندہ عید سے قبل حاضر سروس اور ریٹائرڈ ملازمین کو تنخواہوں اور پنشن کی بروقت ادائیگی یقینی بنائی جائے۔ پی بی سی اور ایس آر بی سی کے ملازمین کی ادائیگیوں کے حوالے سے بھی متعلقہ حکام کو ہدایات جاری کی گئیں۔

کمیٹی کو بریفنگ میں بتایا گیا کہ مالی سال 24۔2023ء کے دوران پی ٹی وی نے 6197 ملین روپے کے مقررہ ہدف کے مقابلے میں 7503 ملین روپے کی آمدن حاصل کی جبکہ رواں مالی سال کے اہداف کے حصول کی توقع ہے۔ کمیٹی کو بتایا گیا کہ پی ٹی وی کو مالی مشکلات کا سامنا ہے اور بجلی کے بلوں میں ٹی وی فیس کی مد میں جمع ہونے والے 10 ارب روپے کا بڑا حصہ تنخواہوں اور پنشن کی ادائیگی کے لیے استعمال کیا جاتا ہے۔

کمیٹی کو مزید بتایا گیا کہ پی ٹی وی سکرینوں میں جدت اور نئے چہروں کے باعث پی ٹی وی کے ناظرین کی تعداد میں اضافہ ہوا ہے۔ کمیٹی کو مزید بتایا گیا کہ پی ٹی وی کے پاس پینشن مینجمنٹ کا ایک مربوط نظام موجود ہے تاہم اس میں مزید بہتری کے لیے پنجاب انفارمیشن ٹیکنالوجی بورڈ کے ساتھ بات چیت کی جا رہی ہے۔ تنخواہوں کی ادائیگی میں تاخیر کے حوالے سے کمیٹی کو بتایا گیا کہ انتہائی اہم بین الاقوامی مالیاتی ذمہ داریوں کی ادائیگی اور بین الاقوامی میڈیا کے حقوق کے حصول کے لیے فنڈز کی منتقلی کے باعث پی ٹی وی کو عارضی مالی مشکلات کا سامنا کرنا پڑا۔

پی ٹی وی انتظامیہ نے نان پرفارمنگ اور سیاسی طور پر تعینات ملازمین کی تفصیلات بھی کمیٹی کے سامنے پیش کیں جنہیں موجودہ تنظیم نو کے دوران ملازمت سے فارغ کیا گیا تھا۔ کمیٹی نے اسلام آباد کے سیکٹر F-14/F-15 اور بارہ کہو میں صحافیوں کو پلاٹوں کی الاٹمنٹ میں تاخیر کا نوٹس لیتے ہوئے وزارت کو ہدایت کی کہ دو ماہ میں درخواستوں کی جانچ پڑتال کو حتمی شکل دی جائے اور تمام متاثرہ افراد کی شکایات کا ازالہ کیا جائے۔

کمیٹی نے پیمرا (ترمیمی) بل 2025ء کے بارے میں ایم این اے مہتاب اکبرراشدی کی کنوینئر شپ کے تحت مقرر کردہ ذیلی کمیٹی کی رپورٹ پر تبادلہ خیال کیا اور پیمرا کو ہدایت کی کہ وہ ذیلی کمیٹی کی سفارشات پر اپنا نقظہ نظر پیش کرے۔ کمیٹی کی کنوینئر اور بل کی محرک نے کمیٹی کو زیر بحث رپورٹ کے بارے میں آگاہ کیا۔ اجلاس میں پارلیمانی سیکریٹری برائے اطلاعات بیرسٹر دانیال چوہدری، ارکان قومی اسمبلی ندیم عباس، کرن عمران ڈار، آسیہ ناز تنولی، کرن حیدر، صلاح الدین جونیجو، مہتاب اکبر راشدی، سحر کامران، سید امین الحق، رعنا انصار، آصف خان، وقاص اکرم، محمد معظم علی خان، مولانا عبدالغفور حیدری نے شرکت کی۔

وزارت اطلاعات کی نمائندگی سیکرٹری اطلاعت، ڈائریکٹر جنرل (آئی پی)، ڈائریکٹر جنرل (پی بی سی) اور وزارت کے ماتحت محکموں کے دیگر افسران نے کی۔