رواں سال بلوچستان شدید خشک سالی کی لپیٹ میں ہے، صوبائی وزیر سردار عبدالرحمن کھتیران

کوئٹہ (اُردو پوائنٹ اخبارتازہ ترین - اے پی پی۔ 30 مئی2025ء) صوبائی وزیر سردار عبدالرحمن کھتیران نے کہا ہے کہ اللہ تعالیٰ پاکستان اور بلوچستان کو ہر قسم کی قدرتی آفات سے محفوظ رکھے۔ انہوں نے کہا کہ رواں سال بلوچستان شدید خشک سالی کی لپیٹ میں ہے، زیرِ زمین پانی کی سطح خطرناک حد تک نیچے جا چکی ہے، اور صوبے کے متعدد ڈیم خشک ہو رہے ہیں۔انہوں نے کہا کہ بعض علاقوں میں پینے کے پانی کی شدید قلت پیدا ہو چکی ہے، جس سے عوام کو مشکلات کا سامنا ہے۔

قدرتی آفات سے نمٹنے کے لیے صوبائی ڈیزاسٹر مینجمنٹ اتھارٹی (پی ڈی ایم اے) پوری طرح متحرک اور فعال ہے جبکہ صوبائی حکومت بھی مکمل طور پر الرٹ ہے۔ایک سوال کے جواب میں سردار عبدالرحمن کھتیران نے کہا کہ جمہوریت میں واک آؤٹ معمول کا حصہ ہوتا ہے۔

(جاری ہے)

کبھی اپوزیشن ہم پر تنقید کرتی ہے اور کبھی ہم اْن پر تنقید کرتے ہیں، لیکن یہ جمہوری عمل کا حسن ہے۔

اپوزیشن ہمارے سیاسی حریف ضرور ہیں، مگر وہ بھی ہمارے دوست اور عوام کے منتخب نمائندے ہیں۔ جتنی اہمیت حکومتی بنچوں کو حاصل ہے، اتنی ہی اہمیت اپوزیشن بنچوں کو بھی حاصل ہے۔انہوں نے مزید کہا کہ پی ڈی ایم اے متحرک ہے اور صوبائی حکومت قدرتی آفات سے نمٹنے کے لیے ہر سطح پر تیار ہے۔ قدرتی آفات کی کوئی پیشگی گارنٹی ممکن نہیں، تاہم حکومت ہر ممکن کوشش کر رہی ہے کہ کسی بھی ہنگامی صورتحال سے بروقت اور مؤثر انداز میں نمٹا جا سکے۔

ہم اللہ تعالیٰ سے دعا گو ہیں کہ پاکستان اور بلوچستان کو ہر قسم کی آفات سے محفوظ رکھے۔ایک اور سوال کے جواب میں صوبائی وزیر نے کہا کہ حکومت کو متعدد چیلنجز کا سامنا ہے، تاہم موجودہ حکومت کو قائم ہوئے ابھی صرف ایک سال ہوا ہے۔ بہت جلد عوام کو کوئٹہ کے بازاروں میں ماضی کی رونقیں دوبارہ نظر آئیں گی۔ صوبائی حکومت بہتر نتائج دینے کے لیے پرعزم ہے۔

انہوں نے کہا کہ ماضی میں بعض مافیاز نے بغیر منصوبہ بندی کے ہائی رائز بلڈنگز تعمیر کیں، جو شہر اور صوبے کے ساتھ ناانصافی تھی۔ اب حکومت کے پاس باقاعدہ ماسٹر پلان موجود ہے، جس پر عملدرآمد شروع ہو چکا ہے۔ ان شائ اللہ کوئٹہ شہر میں جلد واضح تبدیلیاں نظر آئیں گی، کھلی اور کشادہ سڑکیں بنیں گی، اور شہر کی خوبصورتی بحال کی جائے گی۔سردار عبدالرحمن کھتیران نے کہا کہ عوام نے اس حکومت سے جو توقعات وابستہ کی ہیں، ان پر پورا اترنے کے لیے صوبائی حکومت اپنے محدود وسائل میں رہتے ہوئے بھرپور کوششیں کر رہی ہے، اور کوئٹہ کو ایک خوبصورت، منظم اور جدید شہر بنانے کی جانب عملی اقدامات جاری ہیں۔