شرمیلا فاروقی کا اسلام آباد کیپیٹل ٹیریٹری چائلڈ میرجز ریسٹرینٹ ایکٹ 2025 کی صدارتی منظوری کا خیرمقدم

اسلام آباد (اُردو پوائنٹ اخبارتازہ ترین - این این آئی۔ 30 مئی2025ء) رکن قومی اسمبلی پاکستان پیپلز پارٹی شرمیلا فاروقی نے اسلام آباد کیپیٹل ٹیریٹری چائلڈ میرجز ریسٹرینٹ ایکٹ 2025 کی صدارتی منظوری کا خیرمقدم کرتے ہوئے اسے پاکستان کے قانون سازی کے سفر میں بچوں کے حقوق اور وقار کے تحفظ کی جانب ایک تاریخی سنگ میل قرار دیا ہے۔صدر آصف علی زرداری کی جانب سے اس قانون پر دستخط کیے گئے، جس کے تحت شادی کے لیے لڑکیوں اور لڑکوں دونوں کی کم از کم قانونی عمر 18سال مقرر کی گئی ہے، کم عمری کی شادیوں کو جرم قرار دیا گیا ہے، اور ایسی شادیوں کو انجام دینے، ان میں سہولت فراہم کرنے یا ان کی معاونت کرنے والوں کے لیے سخت سزائیں متعارف کرائی گئی ہیں۔

ڈاکٹر شرمیلافاروقی نے کہا کہ اس قانون پر دستخط کر کے صدر زرداری نے نہ صرف ایک آئینی فریضہ ادا کیا ہے بلکہ وہ تاریخ کے صحیح رخ پر کھڑے ہوئے ہیں۔

(جاری ہے)

وہ انصاف کے لیے کھڑے ہوئے ہیں، ان بے آوازوں کے لیے کھڑے ہوئے ہیں، ان لاکھوں بچیوں کے لیے کھڑے ہوئے ہیں جن کا بچپن، تعلیم اور مستقبل کم عمری کی شادی کے ظالمانہ رواج کے ذریعے چھین لیا جاتا ہے۔

یہ صرف ایک قانونی کامیابی نہیں بلکہ ایک اخلاقی فتح ہے۔ ڈاکٹر سرمیلافاروقی نے زور دے کر کہا کہ یہ قانون صرف چند دفعات پر مشتمل نہیں بلکہ یہ شہید محترمہ بے نظیر بھٹو کے دیرپا وژن کی عکاسی کرتا ہے، جن کی خواتین کے حقوق اور بچوں کے تحفظ کے لیے جدوجہد آج بھی پاکستان کے راستے کو متعین کر رہی ہے۔ انہوں نے کہا کہ یہ ایکٹ ان کی یاد کے نام منسوب ہے ان اعلی اقدار کو خراج تحسین پیش کیا جو انہوں نے اپنی زندگی میں اپنائیں اور جن کے لیے وہ قربان ہوئیں۔

نئے قانون کے دور رس اثرات کو اجاگر کرتے ہوئے ڈاکٹر شرمیلافاروقی نے کہا کہ یہ قانون بے شمار کم عمر بچوں کو استحصال اور صدمے سے بچانے میں مدد دے گا۔ یہ پاکستان کی ہر بچی کے لیے ایک پیغام ہے کہ تمہارے حقوق اہم ہیں، تمہارا بچپن اہم ہے، اور ریاست تمہارے ساتھ کھڑی ہے۔ انہوں نے صدر زرداری کی جانب سے مزاحمت کے باوجود ثابت قدمی سے کھڑے رہنے پر تہہ دل سے شکریہ ادا کیا اور کہا کہ انہوں نے ایسا کر کے پاکستان کے بچوں کے لیے تحفظ اور امید کا ایک نیا باب رقم کیا ہے۔

ڈاکٹر شرمیلافاروقی نے آخر میں قوم سے اپیل کی کہ وہ اس دن کو ایک نئے دور کے آغاز کے طور پر یاد رکھے۔ انہو ں نے کہا کہ آئیے اس دن کو ایک ایسے دن کے طور پر یاد رکھیں جب اپنے تمام بچوں کے لیے پاکستان نے انصاف، وقار اور مساوات کی جانب ایک قدم بڑھایا ۔