سینیٹر مشاہد حسین سید کی روسی وزیر خارجہ سے ملاقات،بھارت کشیدگی کے دوران روس کے ’مثبت غیرجانبدارانہ‘ کردار پر اظہار تشکر

ماسکو (اُردو پوائنٹ اخبارتازہ ترین - اے پی پی۔ 31 مئی2025ء) سینیٹر مشاہد حسین سید نے روسی وزیر خارجہ سرگئی لاوروف سے ملاقات کی اور حالیہ پاک۔بھارت کشیدگی کے دوران روس کے ’مثبت غیرجانبدارانہ‘ کردار پر ان کا شکریہ ادا کیا۔ یہاں جاری پریس ریلیز کے مطابق انہوں نے ماسکو کے نواحی شہر پرم میں یوریشین فورم کے آغاز سے قبل روسی وزیر خارجہ کے ساتھ چالیس منٹ طویل ملاقات کی۔

لاوروف نے سینیٹر مشاہد حسین سے پانچ نمایاں ایشیائی رہنماؤں پر مشتمل ایک وفد کے حصے کے طور پر ملاقات کی جس میں چین، ترکی، کوریا اور کمبوڈیا کے نمائندے شامل تھے۔ سینیٹر مشاہد حسین کو روسی وزارت خارجہ اور حکمران جماعت 'یونائیٹڈ رشیا' کی جانب سے پاکستان سے واحد مہمان کی حیثیت سے خصوصی دعوت دی گئی تھی تاکہ وہ یوریشین فورم میں کلیدی خطاب کریں جس میں 25 یوریشیائی ممالک کے 100 سے زائد مندوبین شریک ہوئے۔

(جاری ہے)

روسی وزیر خارجہ نے زور دیا کہ روس کی خارجہ پالیسی کا محور خطے میں امن، سلامتی اور استحکام کو فروغ دینا ہے۔ سینیٹر مشاہد نے صدر پیوٹن کے یوریشین سکیورٹی اقدام کو بھی سراہا جس میں سکیورٹی کو 'ناقابل تقسیم' تصور کیا گیا ہے۔ اس ضمن میں انہوں نے کہا کہ یہ چین کے صدر شی جن پنگ کے گلوبل سکیورٹی انیشی ایٹو سے مماثلت رکھتا ہےجو اقوام متحدہ کے چارٹر کی پاسداری کرتا ہے۔

سینیٹر مشاہد نے ’ایشین نیٹو‘ یا ’انڈو-پیسیفک سٹریٹجی‘ کے تصور کو رد کیا کیونکہ یہ بین الاقوامی تعلقات کی عسکریت کی عکاسی کرتے ہیں۔بعد ازاں، چین، ترکی، جنوبی کوریا اور کمبوڈیا کے دیگر نمایاں ایشیائی رہنماؤں کے ہمراہ سینیٹر مشاہد نے یوریشین فورم میں روسی وزیر خارجہ کے ساتھ شرکت کی۔ فورم میں اپنے خطاب میں مغرب نواز دو اہم اتحادوں کواڈ (QUAD) اور 'انڈو-پیسیفک سٹریٹجی'پر تنقید کی گئی جن میں بھارت کا فعال کردار ہے۔

یہ تنقید روس کی بھارت کے مغرب نواز اور چین مخالف کردار پر عوامی ردعمل کی عکاسی کرتی ہے۔روسی وزیر خارجہ کے اہم پالیسی خطاب سے تین بنیادی نکات سامنے آئے جو پاکستان کے لیے خصوصی اہمیت کے حامل ہیں۔ انہوں نے نام نہاد 'انڈو-پیسیفک اسٹریٹجی' پر تنقید کی جس کا بھارت اہم حصہ ہے۔اس ضمن میں انہوں نے کہا کہ ’یہ انڈو-پیسیفک کبھی موجود ہی نہیں تھا بلکہ نیٹو نے اسے چین مخالف منصوبوں میں بھارت کو سامنے لانے کے لیے بنایا۔

لاوروف نے چار ملکی فوجی اتحاد کواڈ (امریکا، جاپان، آسٹریلیا، بھارت) میں بھارتی شرکت پر بالواسطہ تنقید کی جو کہ بی جے پی سے تعلق رکھنے والے تین ارکانِ پارلیمان سمیت بھارت کے 12 رکنی مضبوط وفد کے سامنے کی گئی۔ لاوروف نے بھارت کی کواڈ میں شمولیت پر کہا کہ ہم نے بھارتی ہم منصبوں سے بات چیت کی جنہوں نے وضاحت پیش کی ہے کہ ان کی شمولیت صرف تجارت اور معیشت تک محدود ہے تاہم درحقیقت کواڈ ممالک مستقل مزاجی سے مشترکہ بحری مشقوں کے انعقاد کی کوششیں کر رہے ہیں۔

واضح رہے کہ کانفرنس میں بھارتی وفد لاوروف کی اس بے باک تنقید پر سکتے میں آگیا۔لاوروف نے افغانستان سے متعلق ایک اور اہم بات کہی۔ انہوں نے نیٹو پر افغانستان میں دوبارہ داخلے کی کوشش کا الزام عائد کرتے ہوئے کہا کہ اپنی ذلت آمیز پسپائی کے چار سال بعد نیٹو ایک بار پھر افغانستان میں نئے داخلی راستوں کی تلاش میں ہے۔روسی میڈیا سے گفتگو کرتے ہوئے سینیٹر مشاہد حسین نے حالیہ پاک-بھارت کشیدگی میں روسی حکومت اور عوام کے مثبت کردار اور پاکستان کے لیے ان کی گرمجوشی و دوستی پر ان کا شکریہ ادا کیا۔

انہوں نے صدر پیوٹن اور صدر شی جن پنگ کی کاوشوں کو سراہتے ہوئے کہا کہ یہ دونوں مضبوط قائدین ایک پرامن اور خوشحال یوریشیا کی تعمیر کے لیے اکٹھے آگے بڑھ رہے ہیں جو ایک ایسا خواب ہے جس میں پاکستان ایک مساوی شراکت دار کی حیثیت سے کلیدی کردار ادا کرے گا۔