لوگ ہم پر اعتماد کر رہے ہیں اور کام کو ہی ووٹ ملتا ہے، نواز شریف

ن لیگ نے ہی دفاع کو مضبوط بنایا اور ایٹمی دھماکے کئے تھے، سیاست کے ساتھ ساتھ کام بھی ہونا چاہئے، ملک بہتر ہو رہا ہے معیشت مضبوط ہو رہی ہے، پچھلی حکومت نے ملک کا برا حال کر دیا تھا، صدرن لیگ کی لندن پہنچنے پر صحافیوں سے گفتگو

فیصل علوی پیر 2 جون 2025 12:15

لوگ ہم پر اعتماد کر رہے ہیں اور کام کو ہی ووٹ ملتا ہے، نواز شریف

لندن(اردوپوائنٹ اخبار تازہ ترین۔02 جون 2025)پاکستان مسلم لیگ ن کے صدر نواز شریف نے کہا ہے کہ لوگ ہم پر اعتماد کر رہے ہیں اور کام کوہی ووٹ ملتا ہے، لوگ کام کو ووٹ دیتے ہیں، سیاست کے ساتھ ساتھ کام بھی ہونا چاہئے،ن لیگ نے ہی دفاع کو مضبوط بنایا اور ایٹمی دھماکے کئے تھے،لندن میں ایوان فیلڈ پہنچنے پر صحافیوں سے گفتگو کرتے ہوئے سابق وزیراعظم کا کہنا ہے کہ سمبڑیال کاالیکشن جیتنے پر اللہ کا شکر ادا کرتے ہیں۔

مسلم لیگ ن ملک کی ترقی میں اپنا کردار ادا کر رہی ہے۔ لوگ ہم پر اعتماد کر رہے ہیں پچھلی حکومت نے ملک کا برا حال کر دیا تھا۔ ملک بہتر ہو رہا ہے معیشت مضبوط ہو رہی ہے۔ہمارے زمانے میں 4 سال تک روپیہ مستحکم رہا شرح نمو 7 کو چھو رہی تھی۔ پچھلی حکومت نے جو ملک کا حال کیا تھا مسلم لیگ بتدریج اسے بہتر بنارہی ہے۔

(جاری ہے)

ہر چیز استحکام کی جانب واپس لوٹ رہی ہے۔

ملکی حالات بہتر ہورہے ہیں۔انہوں نے کہا کہ ہم نے ہی چین کے ساتھ مل کر جے ایف17تھنڈر طیارے بنائے تھے۔پاکستان کو میزائل ٹیکنالوجی دی۔خیال رہے کہ صدر مسلم لیگ (ن) اور سابق وزیراعظم نواز شریف گزشتہ روزلندن روانہ ہوگئے تھے۔نواز شریف کے ہمراہ ان کے ہمراہ صاحبزادے حسن نواز بھی موجود تھے۔نواز شریف اولڈ ٹرمینل سے خصوصی طیارے کے ذریعے لاہور سے لندن کیلئے روانہ ہو ئے تھے۔

سابق وزیراعظم نواز شریف خصوصی طیارے کے ذریعے لاہور سے لندن روانہ ہوئے تھے۔ برطانوی وقت کے مطابق نواز شریف شام 6 بجے لندن پہنچ گئے تھے۔بتایاگیا تھا کہ صدر مسلم لیگ (ن )نواز شریف لندن میں اپنا چیک اپ کرائیں گے۔عید الاضحی بھی لندن میں ہی اپنے بیٹوں و دیگر اہلخانہ کے ہمراہ منائیں گے۔ میاں نوازشریف لندن میں چند روز قیام کریں گے۔ میڈیکل چیک اپ کروائیں گے۔ سابق وزیراعظم وصدر ن لیگ اپنا میڈیکل چیک اپ کروانے کے بعد پاکستان واپس آئیں گے۔نواز شریف کا لندن میں قیام تقریبا 2 ہفتے طویل ہونے کا امکان ہے۔اس سے قبل نواز شریف گزشتہ سال اکتوبر میں لندن گئے تھے اور اب 7 ماہ بعد وہ دوبارہ لندن کیلئے روانہ ہوئے تھے۔