سمبڑیال کے عوام کے حقوق پر ڈاکہ ڈالا گیا،پاکستان میں جمہوریت نہیں ڈھونگ ، ڈکٹیٹر شپ نے لبادہ اوڑھ رکھا ہے ‘سلمان اکرم راجہ

لاہور (اُردو پوائنٹ اخبارتازہ ترین - این این آئی۔ 02 جون2025ء) پاکستان تحریک انصاف کے مرکزی سیکرٹری جنرل سلمان اکرم راجہ نے کہا ہے کہ پاکستان میں جمہوریت نہیں ڈھونگ ہے، ڈکٹیٹر شپ نے لبادہ اوڑھ رکھا ہے ،ضمنی الیکشن میں سمبڑیال کے عوام کے حقوق پر ڈاکہ ڈالا گیا،انتخابی عمل میں خلل ڈالنے سے جمہوری حقوق متاثر ہوتے ہیں، ہم پارلیمنٹ اور عدلیہ کے سامنے آواز اٹھاتے رہیں گے،تحریک عوام نے چلانی ہے، پی ٹی آئی نے نہیں، یہ پاکستان کے مستقبل کا معاملہ ہے، پی ٹی آئی کے مستقبل کا نہیں، لوگ بانی پی ٹی آئی کے ساتھ ہیں اور ساتھ رہیں گے، عمران خان کے بچے سیاست میں آنا چاہیں تو کوئی نہیں روک سکتا۔

ان خیالات کا اظہار انہوں نے لاہور پریس کلب میں اپوزیشن لیڈر پنجاب اسمبلی ملک احمد خان بھچر اور دیگر کے ہمراہ پریس کانفرنس کرتے ہوئے کیا ۔

(جاری ہے)

سلمان اکرم راجہ نے کہا کہ ریاست اور عام آدمی کے درمیان ووٹ رشتہ ہے مگر اس وقت ووٹ چوری کا سانحہ جس سے پاکستان گزر رہا ہے ،ہم ایسے ملک میں تو نہیں جہاں ڈکٹیٹر بیٹھا ہو، آٹھ فروری کو آئین پر حملہ ہوا اور کل پھر ڈاکا ڈالا گیا، ووٹ پر ڈاکا عوام اور ریاست پر حملہ ہے، پاکستان میں جمہوریت نہیں ڈھونگ ہے، ڈکٹیٹر شپ نے لبادہ اوڑھ رکھا ہے عدلیہ آزاد نہیں ہے اس نظام میں سچ کو دیکھنے کی ہمت نہیں ۔

انہوںنے کہا کہ حق کی آواز بلند کرنا ہمارا فریضہ ہے اور اس کو ہم ادا کر رہے ہیں، کل ڈاکا سمبڑیال کے عوام پر نہیں بلکہ پورے ملک کے عوام پر تھا، آج ہسپتالوں میں صحت کی سہولیات نہیں ہیں، ہماری قوم کو علم سے دور رکھ کر مفلوج کیا گیا، یہی وجہ پاکستان میں جمہوریت بہت تھوڑے وقت کے لئے آئی، بانی پی ٹی آئی جیل میں اصول کی جنگ کے لیے ہیں میری پوری قوم سے درخواست جہدوجہد کا حصہ بنیں۔

انہوں نے کہا کہ آٹھ فروری کے الیکشن میں یہ دھاندلی کا طریقہ سیکھ رہے تھے، اب فارم 45پہلے سے جیب میں ڈال رکھے تھے، ہمارے پولنگ ایجنٹ کو اندر سے نکال دیا گیا، 26ویں آئینی ترمیم میں ہمیں عدلیہ سے کوئی توقعات نہیں ہے، ہماری تحریک شروع ہے اور جاری رہے گی۔انہوں نے کہا کہ تحریک عوام نے چلانی ہے، پی ٹی آئی نے نہیں، یہ پاکستان کے مستقبل کا معاملہ ہے، پی ٹی آئی کے مستقبل کا نہیں، بھارت اس لیے جارحیت کر رہا ہے کہ پاکستان میں جمہوریت نہیں ہے۔

انہوں نے کہا کہ انتخابی عمل میں خلل ڈالنے سے جمہوری حقوق متاثر ہوتے ہیں، ہم پارلیمنٹ اور عدلیہ کے سامنے آواز اٹھاتے رہیں گے۔انہوں نے کہا کہ الیکشن نے ثابت کر دیا کہ لوگ بانی پی ٹی آئی کے ساتھ ہیں اور ساتھ رہیں گے، بانی پی ٹی آئی عمران خان کے بچے سیاست میں آنا چاہیں تو کوئی نہیں روک سکتا۔اس موقع پر اپوزیشن لیڈر ملک احمد خان بھچر نے کہا کہ اس حکومت کا سمڑیال میں ایک الیکشن ٹیسٹ تھا مگر وہاں پولیس گردی اور فسطائیت کی انتہا ہوگئی، ہمارے لوگوں کو گھسیٹ کر باہر نکالا گیا، انہوں نے بوگس ووٹ ڈالے کل میں 3پولنگ اسٹیشنز پر تھا جہاں ہمارا ریشو 20فیصد تھا، نتیجہ آیا تو بی بی نے اپنے فوت ہونے والے والد سے بھی 20ہزار زائد ووٹ لیے، کل پوری کوشش کی گئی کہ فساد کروایا جائے، ہم پر لاٹھی چارج ہوا، پنجاب کے تمام اسٹیک ہولڈرز وہاں موجود تھے ہم نے بتایا کے ہم ایک منظم جماعت ہیں۔

ریجنل پریزیڈنٹ پی ٹی آئی احمد چٹھا نے کہا کہ جو الیکشن ہوا اس سے ثابت ہوا کہ بندے عوام نہیں چن رہی، جب بندے عوام نہیں چن رہی تو یہ خدمت کیسے کریں گی ،2024 سے 20ہزار ووٹ زیادہ ڈالے گئے یہ کیسے ممکن ہے، دھاندلی کی شروعات وہیں سے ہوجاتی ہے۔انہوں نے کہا کہ جب پنجاب حکومت اپنے ملازم آر او لگاتی ہے، پہلے ہی بیلٹ پیپر الگ کر لئے جاتے ہیں، جس پر ٹھپے لگے ہوتے ہیں، الیکشن سے کئی دن پہلے بیلٹ باکس بھروا کر رکھے جاتے ہیں، پولیس کا کام ہوتا ہے ہمیں ڈرانا اور الیکشن تھوڑی دیر کے لئے روکنا، اس تھوڑی دیر میں یہ بیلٹ باکس تبدیل کرتے ہیں۔