وزیراعظم کے مشیر رانا ثناء اللہ کی زیر صدارت اجلاس میں سائوتھ ایشین گیمز کے انعقاد کے حوالے سے تفصیلی تبادلہ خیال

اسلام آباد (اُردو پوائنٹ اخبارتازہ ترین - اے پی پی۔ 02 جون2025ء) وزیراعظم کے مشیر برائے بین الصوبائی رابطہ رانا ثناء اللہ کی زیر صدارت اسلام آباد میں اہم اجلاس منعقد ہوا جس میں 14ویں سائوتھ ایشین گیمز کے انعقاد کے حوالے سے تفصیلی تبادلہ خیال کیا گیا۔ اجلاس میں وفاقی سیکرٹری برائے بین الصوبائی رابطہ محی الدین وانی، ڈی جی پاکستان سپورٹس بورڈ، پنجاب پولیس، وزارت خارجہ اور چاروں صوبوں سے متعلقہ اعلی حکام نے شرکت کی ۔

اجلاس میں وفاقی مشیر رانا ثناء اللہ کو 14 ویں سائوتھ ایشین گیمز کے انعقاد سے متعلق بریفنگ دی گئی۔ اجلاس میں وفاقی مشیر کو بتایا گیا کہ پاکستان اولمپک ایسوسی ایشن نے اپنی سفارشات وزارت بین الصوبائی رابطہ کو پیش کر دی ہیں جس پر رانا ثناء اللہ نے وفاقی سیکرٹری کی سربراہی میں ایک اعلی سطحی کمیٹی کی تشکیل کا حکم دیا۔

(جاری ہے)

رانا ثناء اللہ نے ہدایات جاری کیں کہ اس کمیٹی میں آزاد کشمیر اور گلگت بلتستان سمیت چاروں صوبوں سے نمائندہ ارکان شامل کیے جائیں۔

یہ کمیٹی پاکستان اولمپک ایسوسی ایشن کی سفارشات کا جائزہ اور ان پر عمل درآمد کرنے کے لیے اپنی رپورٹ دو ہفتوں کے اندر حکومت کو پیش کرے گی۔ یہ کمیٹی میگا ایونٹ کے انعقاد کے لئے بجٹ، سکیورٹی سمیت میچز کے مقامات بارے حکومت کو تجاویز دے گی۔ رانا ثناء اللہ نے اعلان کیا کہ 14 ویں سائوتھ ایشین گیمز جنوری 2026ء تک پاکستان میں منعقد ہوں گی جو ملک کے لیے ایک بڑا اعزاز ہے۔

انہوں نے مزید کہا کہ اس ایونٹ میں مجموعی طور پر 27 کھیل شامل ہوں گے۔ انہوں نے کہا کہ حکومت پاکستان بین الاقوامی معیار کے مطابق کھیلوں کے انعقاد کو یقینی بنانے کے لیے تمام وسائل بروئے کار لائے گی۔ اس موقع پر اجلاس میں کھیلوں کے انعقاد کے دوران درپیش ممکنہ چیلنجز اور مسائل پر بھی تفصیلی تبادلہ خیال کیا گیا تاکہ ہر ممکنہ رکاوٹ کا پیشگی حل نکالا جا سکے۔

اجلاس میں اس بات پر بھی زور دیا گیا کہ سائوتھ ایشین گیمز جیسے بین الاقوامی مقابلے پاکستان کے مثبت تشخص کو اجاگر کرنے میں کلیدی کردار ادا کریں گے۔ رانا ثناء اللہ نے کہا کہ پاکستان کی میزبانی میں ہونے والی شنگھائی تعاون تنظیم سمٹ، چیمپئنز ٹرافی اور سائوتھ ایشین گیمز اس بات کا ثبوت ہیں کہ پاکستان ایک محفوظ ملک ہے اور بین الاقوامی ایونٹس کی میزبانی کے لیے مکمل طور پر تیار ہے۔

رانا ثناء اللہ نے اجلاس کے دوران اس امر پر بھی روشنی ڈالی کہ پنجاب حکومت اور اسلام آباد انتظامیہ کھیلوں کے مقامات اور اعلیٰ معیار کی مہمان نوازی فراہم کرنے کے لیے متحرک ہیں۔ حکومت نہ صرف ان کھیلوں کے کامیاب انعقاد کے لیے پرعزم ہے بلکہ مستقبل میں بھی بین الاقوامی کھیلوں کے مقابلوں کی میزبانی کے لیے اپنی تمام تر صلاحیتوں کو بروئے کار لائے گی۔ اجلاس کے اختتام پر تمام متعلقہ اداروں کو ہدایات جاری کی گئیں کہ وہ انتظامات کو جلد از جلد حتمی شکل دیں تاکہ یہ تاریخی ایونٹ بہترین انداز میں منعقد کیا جا سکے۔